პოლიციის მაღალჩინოსანმა, იოსებ სიგუამ, რომელსაც ცოლი ფუზიკურ ძალადობასა და მუქარაში ადანაშაულებს, თანამდებობა დატოვა.
კაცი, რომელიც შინაგან საქმეთა სამინისტროს ცენტრალური კრიმინალური პოლიციის დეპარტამენტის ორგანიზებულ დანაშაულთან ბრძოლის მთავარი სამმართველოს უფროსად 2 დღის წინ დაინიშნა, სასამართლო პროცესზე ამბობს, რომ უწყებას განცხადებით სასამართლო პროცესამდე რამდენიმე საათით ადრე მიმართა.
“პირველების” ინფორმაციით, სულხან თამაზაშვილმა სიგუას განცხადება უკვე დააკმაყოფილა.
- განახლება: რამდენიმე წუთის წინ, შინაგან საქმეთა სამინისტროს პრესსამსახურმა TV პირველს ოფიციალურად დაუსასტურა ინფორმაცია, რომ ცენტრალური კრიმინალური პოლიციის ორგანიზებულ დანაშაულთან ბრძოლის მთავარი სამმართველოს უფროსმა თანამდებობა დატოვა.
ცნობისთვის, იოსებ სიგუას ელექტრონული სამაჯური “შაბათის ეთერის” მიერ გასაჯაროებული სკანდალური ინტერვიუდან ერთი კვირის თავზე, დღეს შეაბეს.
სანამ სიგუას ელექტორნულ სამაჯურს შეაბამდნენ, მანამდე იყო ცოლის ზარი 112-ში. სოფია სიგუა – შატბერავა “პირველებს” უყვება, რომ ამ ზარის შესახებ ინფორმაცია პოლიციის მაღალჩნოსნამდე მივიდა რომელიც ითხოვდა, რომ მას შეტყობინება გაეუქმებინა.
შეგახსენებთ, რომ იოსებ სიგუას ცოლი სოფია სიგუა – შატბერავა “შაბათის ეთერისთვის” მიცემულ ექსკლუზიურ ინტერვიუში ამბობს, რომ პოლიციიის მაღალჩინოსანი ქმარი მას “12-ე სართულიდან გადაგდებით”, “კასრში ჩასმითა და დამარხვით” ემუქრებოდა. სოფია სიგუას თქმით, “იოსებ სიგუამ მას იარაღი შუბლზე დაადო და სიცოცხლის მოსპობით ემუქრებოდა”. ქალი ჰყვებოდა, რომ პოლიციელი მას ორსულობის დროსაც სცემდა.
“შაბათის ეთერში” გასული რეპორტაჟიდან რამდენიმე დღეში შსს-მ იოსებ სიგუა დააწინაურა – 2 დღის წინ, ის ცენტრალური კრიმინალური პოლიციის დეპარტამენტის ორგანიზებულ დანაშაულთან ბრძოლის მთავარი სამმართველოს უფროსად დანიშნა. იქამდე, სიგუა თბილისის პოლიციის დეტექტივების სამმართველოს უფროსი იყო.