გერმანიის ქალაქ ინგოლშტადში მიმდინარე აუდის საერთაშორისო ფესტივალში სხვადასხვა თაობის ქართველი მუსიკოსები იღებენ მონაწილეობას. ფესტივალი, რომლის სამხატვრო ხელმძღვანელი მსოფლიო ვარსკვლავი, ქართველი მევიოლინე ლიზა ბათიაშვილი გახლავთ, 30 ივნისს გაიხსნა. ბილეთების გაყიდვით შემოსული თანხა უკრაინელი ნიჭიერი ბავშვებისა და ახალგაზრდების ხელშეწყობის პროექტს მოხმარდება.
1-ელ ივლისს გერმანელი პუბლიკის წინაშე 12 წლის ქართველი კომპოზიტორი და პიანისტი ცოტნე ზედგინიძე წარდგა. ინგოლშტადის ქართულ ორკესტრთან Georgisches Kammerorchester Ingolstadt და ნიკოლოზ რაჭველთან ერთად მან საკუთარი ნაწარმოების „ფანტაზია ფორტეპიანოსა და ორკესტრისთვის” შეასრულა.
„ეჭვგარეშეა, რომ ცოტნე ზედგინიძე არა მხოლოდ ფორტეპიანოს უდიდესი გენიოსი გახლავთ, არამედ უნიკალური კომპოზიციური ნიჭით დაჯილდოვებული ავტორია. ამ ბრწინვალე პრემიერის შემდეგ, მის სახელს მომავალში მრავალი საერთაშორისო სცენიდან მოვისმენთ. ბონუსის სახით, ცოტნემ მსმენელს ფენომენალური ოსტატობით შესრულებული, ჰაეროვანი, ვირტუოზული, მღელვარე და დამათრობელი ბისი აჩუქა.“ – წერს ფესტივალის მუსიკალური კრიტიკა.
