10 წლის ბიჭის ოჯახი კლინიკა გორმედის ექიმების სისხლისსამართლებრივ პასუხისმგებლობას ითხოვს. მათი თქმით, მედიკოსების გულგრილობისა და არასწორად შეფასებული მდგომარეობის გამო, მოზარდს ფეხის ამპუტაცია დასჭირდა. ოჯახი ამბობს, რომ გორმედში ვერ გაიგეს, რომ ბავშვს თრომბი განუვითარდა, რამაც მძიმე შედეგი გამოიწვია.
“ვენები დახეთქილი იყოო, თრომბი განვითარებული ყოფილა და ჩვენ ეს არ ვიცოდით იმიტომ, რომ ექიმმა ვერ გაიგო, არ გაგვაფრთხილა, თუნდაც რომ შევეშინებინეთ, რომ სასწრაფოდ ჩვენ თვითონ გადაგვეყვანა ბავშვი და მიგვეხედა. 2-საათიანი დაგვიანებით მოვიდა რეანომობილი, მერე სანამ თბილისში ჩავედით, შევედით ინგოროყვას კლინიკაში. მეორე დღეს, 4-საათიანი ლოდინის შემდეგ რომ გვეგონა, რომ აღდგებოდა ფეხი, ექიმი ტირილით გამოვიდა და გვითხრა, რომ იძულებული ვარ ფეხი მოვკვეთოო” – ამბობს ბავშვის ოჯახის წევრი.
“დიდი ჭრილობა არ არის და არც არტერია აქვს გაჭრილიო, უბრალოდ ძარღვებია დახეთქილი და ვენური სისხლდენააო. ვაბრალებ მე ექიმების უყურადღებობას, არ მიუთითეს, რომ იყო მძიმე პაციენტი” – ამბობს ოჯახის კიდევ ერთი წევრი. [ფორმულა]
10 წლის ბიჭი სოფელ დიდ გარეჯვარში 3 ივლისს ველოსიპედით მოძრაობისას დაშავდა. ოჯახმა უკვე მიმართა პოლიციას და საქმეში ჯანდაცვის სამინისტროს ჩართვასაც ითხოვს. კლინიკა გორმედი ამ დროისათვის ბრალდებებს არ გამოხმაურებია. ბავშვი ამჟამად თბილისში, ინგოროყვას სახელობის კლინიკაში მკურნალობს.