თბილისის საქალაქო სასამართლოში ალექსანდრე ელისაშვილის საქმის მორიგი განხილვის დაწყებამდე მისი მამა, ვალერი ელისაშვილი, ბრალდებებს გამოეხმაურა და განაცხადა, რომ მისი შვილი „სამშობლოს მოყვარული ადამიანია“. მან ასევე გაიხსენა 1992 წლის მოვლენები, როდესაც, მისი თქმით, 14 წლის ალეკო ელისაშვილი აფხაზეთში ომში წასვლის მცდელობისას დააკავეს. ალექსანდრე ელისაშვილი 2025 წლის ნოემბრიდან ტერორისტული აქტის მცდელობის ბრალდებით პატიმრობაში იმყოფება.
“დამირეკა უცხო, ახალგაზრდა კაცმა. თქვენი შვილი ქალაქის სასამართლოს ტერიტორიაზე დააკავეს სხვისი ნივთის დაზიანებისთვისო. დილით 7 საათზე ამ ადამიანმა გამაგებინა ეს ამბავი და რამდენიმე საათში გამოვიდა ბატონი პაპუაშვილი – ალექსანდრე ელისაშვილი დაკავებულია როგორც უცხო ქვეყნის აგენტი ტერორისტული აქტის ჩადენის მცდელობითო. რა თქმა უნდა, ჩემებურად გავეცი გულში პასუხი, მაგრამ ვერ გაიგონებდა ტელევიზორში. მაგას [ელისაშვილს] რომ სამშობლო უყვარს, ნეტა მაგას უყვარდეს. ალეკო ელისაშვილი 1992 წელს იყო 14 წლის. მილიციის თანამშრომლებს დაუკავებიათ და მოაბრძანეს სახლში, მიდიოდა აფხაზეთში ომში. მაშინ, ბატონი პაპუაშვილი და მისნაირები სად იყვნენ მაინტერესებს? ” [TV პირველი] – განაცხადა ალეკო ელისაშვილის მამამ, ვალერი ელისაშვილმა დღევანდელი სასამართლო პროცესის დაწყების წინ.
ელისაშვილი 2025 წლის 29 ნოემბერს დააკავეს. გამოძიების მტკიცებით, თბილისის საქალაქო სასამართლოს კანცელარიის დაწვა სცადა. მოგვიანებით, პროკურატურამ მას ბრალი დაუმძიმა და წარუდგინა კიდევ ერთი ეპიზოდი, რომლის მიხედვითაც მან მანამდე, 2025 წლის 4 მაისსაც სცადა თბილისის საქალაქო სასამართლოს არქივისა და ფასადის დაწვა. გამოძიება საქართველოს სისხლის სამართლის კოდექსის 323-ე მუხლით [ტერორისტული აქტის მცდელობა] მიმდინარეობს, რაც დანაშაულის დამტკიცების შემთხვევაში 10-დან 15 წლამდე თავისუფლების აღკვეთას ითვალისწინებს.