მიხეილ სააკაშვილის განცხადებით, თბილისის ცენტრში დამონტაჟებული კამერები, რომლებიც, მისი თქმით, ეფ-ეს-ბესთან დაკავშირებულ სისტემებს უკავშირდება, მოქალაქეთა სახეებს ამოიცნობს და მონაცემები მოსკოვში იტვირთება.
“დიქტატურამ ჩაიდინა მორიგი დანაშაული. თქვენი პერსონალური მონაცემები გადასცეს პირდაპირ ეფ-ეს-ბეს სამსახურებს. ეფ-ეს-ბეს დააყენებინეს კამერები თბილისის ცენტრში და იქიდან აიტვირთება სახეები სახის ამომცნობებით მოსკოვში და ეს საშუალებას აძლევს მათ ყველაზე ჰქონდეთ სია შედგენილი. ივანიშვილმა გაანადგურა ჩვენი შეიარაღებული ძალები, ივანიშვილმა მთელი ეკონომიკა ჩამოკიდა რუსეთს და პრაქტიკულად გაამზადა საქართველო რუსეთისთვის გადასაცემად იმიტომ, რომ ყველა მეგობარი დაგვაკარგვინა. თუ ეს ასე გაგრძელდა, რუსეთი ძალიან მალე შემოვა სამწუხაროდ, ყველას დაიჭრეს ვისზეც აქვს უკვე მონაცემები, გაანადგურებს ვინც ივანიშვილმა არ დაიჭირა იმასაც, კარდაკარ ჩამოივლის ჩვენი პერსონალური მონაცემებით და სისხლის გუბეებს დააყენებს. ამის რეალური საფრთხეა დღეს. თუ ესენი სასწრაფოდ არ მოვიშორეთ” – თქვა მიხეილ სააკაშვილმა დღეს, ე.წ. საბოტაჟის საქმის სასამართლო პროცესზე.
საქართველოს შინაგან საქმეთა სამინისტრო საპროტესტო აქციების მონაწილეების თვალთვალისთვის რუსული კომპანია Papillon AO-ს მიერ წარმოებულ სანქცირებულ პროგრამას, Polyface-ს იყენებს – ჟურნალისტურ გამოძიება ამ თემაზე საერთაშორისო გამოცემა AlgorithmWatch-მა 27 ივნისს გაავრცელა.
ორგანიზაცია, რომელიც ხელოვნურ ინტელექტს, ალგორითმებსა და ციფრულ ტექნოლოგიებს იკვლევს, აღნიშნავს, რომ ვინაიდან სისტემა რუსეთის იურისდიქციაშია, არსებობს მაღალი რისკი, რომ საქართველოს მოქალაქეების ბიომეტრიულ მონაცემებზე წვდომა რუსულ სპეცსამსახურებს [ФСБ] ჰქონდეთ, რაც ქვეყნის ეროვნულ უსაფრთხოებასა და აქტივისტებს უშუალო საფრთხეს უქმნი.