53 წლის ზვიად ოსიყმაშვილი სოციალურ ქსელში ჟურნალისტ ვახო სანაიას შეურაცხყოფისთვის 2 000 ლარით დააჯარიმეს. როგორც “რადიო თავისუფლება” წერს, სასამართლო სხდომა დღეს, 25 ივნისს გაიმართა, სადაც ოსიყმაშვილი მარტო – ადვოკატის გარეშე მივიდა.
შსს-ს სიძულვილის ენის წინააღმდეგ ბრძოლის სამმართველო 53 წლის კაცს ედავება, რომ მან ერთ-ერთი Facebook მომხმარებლის პოსტის ქვეშ, რომელზეც ვახო სანაია იყო გამოსახული, გინება დაწერა და სანაიას შეურაცხყოფა მიაყენა.
სასამართლოს განაჩენის შემდეგ დაჯარიმებულმა განცხადება გააკეთა: „ინვალიდი ძმა მყავს. ავადმყოფი დედა. მარტო 1500 ლარის წამლები სჭირდება, თირკმლები აწუხებს 2000 ლარს როგორ გადავიხდი, ფაქტობრივად, მე ვარ ოჯახში ერთადერთი შემომტანი“ – თქვა ოსიყმაშვილმა.
თავად სანაია გადაწყვეტილებას ეწინააღმდეგება და “რადიო თავისუფლებასთან” ინტერვიუში ამბობს, რომ “არცერთი ხელისუფლების, არც ამ რეჟიმის საქმე არაა, ვინ რას დაწერს“.
“წარმოდგენა არ მაქვს, ვის უჩივიან და რატომ. წარმოუდგენელი ამბავია, რადგან მე არ მაქვს პრეტენზია სამართლებრივ ნაწილში არავისთან. რა თქმა უნდა, ეს არის აზრის გამოხატვის წინააღმდეგ მიმართული ქმედებაა, იმისათვის, რომ ადამიანებმა არ ილაპარაკონ, არ წერონ.
ჩემთვის სულ ერთია, რა დაწერა ამ ადამიანმა. აქ მთავარია პრინციპი, როგორ ცდილობენ, ადამიანებზე დაამყარონ ტოტალური კონტროლი“ – თქვა სანაიამ.