35 წლის ნინო მუჯირი პირველ სამშობიაროში გუშინ გარდაიცვალა. ახალგაზრდა ქალის ოჯახს ამტკიცებს, რომ პაციენტი ექიმების დაუდევრობას ემსხვერპლა. მათი მტკიცებით, ოპერაცია იმ ექიმმა ჩაუტარა, რომელსაც ლიცენზია არ ჰქონდა. ოჯახი პასუხების მისაღებად დღეს კლინიკის ხელმძღვანელთან მივიდა, ადგილზე ვითარება იმდენად დაიძაბა რომ პოლიცია გამოიძახეს.
35 წლის ახალგაზრდა ქალი პირველ სამშობიაროში 6 თვის წინ მანიპულაციის ჩასატარებლად საკუთარი ფეხით მივიდა, თუმცა მცირე ქირურგიული ჩარევის შემდეგ, მდგომარეობა იმდენად დამძიმდა რომ კომაში ჩავარდა. ოჯახი ექიმის დაუდევრობაზე საუბრობს, ამბობს რომ ნინო მუჯირს წინასწარ გამოკვლევები არ ჩაუტარეს და ანესთეზია ვირუსული ინფექციის დროს გაუკეთეს.
ოჯახი დღეს კლინიკაში სამედიცინო დოკუმენტაციას ითხოვდა, რომ ცხედარს ექსპერტიზა ჩაუტარონ, თუმცა კლინიკის დირექტორისგან კონკრეტული პასუხები ვერ მოისმინეს. მხოლოდ თავის მართლება. ზაზა ავალიანი ამტკიცებს რომ ოპერაცია მან ჩაატარა და უარყოფს რომ მის სამედიცინო დაწესებულებაში მედიკოსები ლიცენზიის გარეშე მუშაობენ. არადა, ოჯახს გარდაცვლილთან მიმოწერა თან აქვთ, რომლითაც დასტურდება რომ ოპერაცია ეკატერინე გაგუამ ჩაატარა.
უკვე რამდენიმე საათია ოჯახი იმ ექიმთან შეხვედრას ითხოვს, ვინც მათი მტკიცებით, ოპერაცია უპასუხისმგებლოდ ჩაატარა და რის გამოც ახალგაზრდა ქალი გარდაიცვალა, თუმცა ეკატერინე გაგუა არც სატელეფონო ზარებს პასუხობს და არც გარდაცვლილის ახლობლებს ხვდება.
ახლა ექსპერტიზამ უნდა დაადგინოს რა გახდა ახალგაზრდა ქალის გარდაცვალების მიზეზი.