ნინი მუჯირის დედა აცხადებს, რომ შვილის გარდაცვალების შემდეგ ოჯახი სამართალდამცავებს მიმართავს და პასუხისმგებლობას ექიმებსა და კლინიკას აკისრებს, რადგან მისი თქმით, ოპერაციის შემდეგ განვითარებულმა გართულებებმა პაციენტის სიცოცხლე იმსხვერპლა.
“ჯანდაცვის მინისტრი დამპირდა, რომ კანონს აღასრულებდა, დამეხმარებოდა ყველანაირად. დასასჯელი დაისჯება. მივდივართ პოლიციაში, ნინოს მამიდები, ნინოს მულები, ნინოს დედამთილი, ჩემი ბიძაშვილები… სამართალი აღსდგება… ჩემი შვილი ვერ გადავარჩინე, არც მომცეს იმის საშუალება, რომ გადამერჩინა, ორ თამაშს თამაშობდა კლინიკის უფროსი” – ამბობს თაიმერთან ინტერვიუში გარდაცვლილი ნინი მუჯირის დედა მარინე მუჯირი
35 წლის ნინი მუჯირი გუშინ გარდაიცვალა. მუჯირმა საშვილოსნოს პოლიპის მოწვის ოპერაცია 12 იანვარს გაიკეთა, 3 საათში კი გაითიშა და კომაში ჩავარდა. ქალს ორგანიზმში ბაქტერია ლეპტოსპიროზი აღმოაჩნდა, რის შემდეგაც სეფსისი განუვითარდა.