საქართველოს გენერალურმა პროკურორმა გიორგი გვარაკიძემ საქართველოს პარლამენტში პროკურატურის საქმიანობის 2025 წლის ანგარიშის წარდგენისას ყურადღება გაამახვილა პროკურატურის სისტემის ინსტიტუციური გაძლიერების, საკადრო პოლიტიკისა და საზოგადოებასთან კომუნიკაციის მიმართულებით განხორციელებულ ღონისძიებებზე.
გიორგი გვარაკიძის განცხადებით, ხელშესახები შედეგების მიღწევა შეუძლებელია პროფესიული კადრების, მათი განვითარების და ინსტიტუციური გაძლიერების გარეშე. მისი თქმით, 2025 წელს მაღალი იყო სისტემის ახალი კადრებით შევსების მაჩვენებელი, მათ შორის სტაჟირებისა და ღია კონკურსების მეშვეობით. როგორც მან აღნიშნა, სტაჟირების პროგრამების ფარგლებში სისტემას 47 ახალი კადრი შეუერთდა, რამაც მნიშვნელოვნად შეუწყო ხელი რაიონული პროკურატურების განახლებასა და გაძლიერებას.
გენერალურმა პროკურორმა ასევე აღნიშნა, რომ 2025 წელს განსაკუთრებული ყურადღება ეთმობოდა თანამშრომელთა პროფესიულ განვითარებასა და მოტივაციის გაზრდას.
გიორგი გვარაკიძემ ანგარიშის წარდგენისას ყურადღება გაამახვილა საზოგადოებასთან კომუნიკაციისა და ანგარიშვალდებულების მიმართულებით მიღწეულ შედეგებზეც.
ანგარიშის შეჯამებისას გენერალურმა პროკურორმა აღნიშნა, რომ პროკურატურა მომავალშიც გააგრძელებს ღიაობის, გამჭვირვალობისა და ეფექტიანი მართლმსაჯულების პრინციპებზე დაფუძნებულ საქმიანობას.