ცოტა ხნის წინ, ხმაური იყო საქალაქო სასამართლოში – მას შემდეგ, რაც სასახლის ღობის საქმეზე დაკავებულ 12 პირს საპროცესო შეთანხმება გაუფორმდა, ბრალდებულმა გიორგი კირვალიძემ პროკურატურასთან შეთანხმების გაუქმება მოითხოვა, თქვა, რომ თავს დამნაშავედ არ ცნობს და სანამ დარბაზს დატოვებდა, დაგმო ბიძინა ივანიშვილი.
ავთანდილ თოფჩიშვილს, სიმონ მახარაძეს, კახაბერ კვაჭანტირაძეს, გია თოლორაიას, მიხეილ თოლორაიას, იური ლომიძეს, გიორგი ტალახაძეს, დავით გიუნაშვილს, საბა კორძაიას, გიორგი კირვალიძეს, კობა ეპიტაშვილს და ბექა მაჭავარიანს საპროცესო შეთანხმება გაუფორმდათ. რაც შეეხება ერთ პირს, მანუჩარ მიქელაძეს, მან საპროცესოს გაფორმებაზე უარი განაცხადა, რის შემდეგაც მოსამართლე თამარ მახარობლიძემ მას 5 წლით პატიმრობა მიუსაჯა.
როგორც სხდომის დასრულების შემდეგ, საქმის პროკურორმა, როინ ხინთიბიძემ განმარტა, რომ გიორგი კირვალიძესთან გაფორმებული საპროცესო შესაძლოა 15 დღის ვადაში გადაიხედოს.
სახელმწიფო მბრალმდებელის თქმით,არ ჰქონიათ ასეთი შემთვევა, რომ ბრალდებულს განაჩენის გამოტანის შემდეგ ეთქვა უარი საპროცესოზე.
“კირვალიძემ პროცესის მიმდინარეობისას აღიარა დანაშაული, განაცხადა, რომ თავს ცნობდა დამნაშავედ წარდგენილ ბრალდებაში. განცხადებით მოგვმართა, დაადასტურა რომ თავს ცნობდა დამნაშავედ წარდგეილ ბრალდებაში. მოსამართლემ მიიღო გადაწყვეტილება და გამოეტანა განაჩენი მის მიმართ. განაჩენსი გამოტანის შემდეგ ის გახდა აგრესიული და თქვა, რომ უკან მიჰქონდა აღიარება, თუმცა ასეთი რაღაც არ არსებობს საპროცესო კოდექსში. განაჩენის გამოტანის შემდეგ უარს ვერ იტყვი. ვიმსჯელებთ ამ ყველაფერზე, ასეთი რამ არასდროს არ მომხდარა, არასდროს არავის უთქვამს უარი საპროცესოზე მას შემდეგ რაც დამტკიცდა.
15 დღის განმავლობაში შესაძლებელია მხარემ გაასაჩივროს საპროცესო შეთანხმების შესახებ გადაწყვეტილება, თუ ბრალდებულმა დაარღვია საპროცესო შეთანხმების პირობა.
მანუჩარ მიქელაძემ პროცესის განმავლობაში ფაქტი დაადასტურა, თქვა რომ პოლიციელსაც ხელი დაარტყა და ცდილობდა პრეზიდენტის სასახლის ეზოში შეჭრას, თუმცა მსიი განმარტებით, ეს არ იყო დანაშაული. ამდენად მან არ ისურვა საპროცესო შეთანხმების გაფორმება, არ აღიარა დანაშაული სრულად, ამიტომ ჩვენს შორის არ იქნა მიღწეული საპროცესო შეთანხმება”, – განაცხადა პროკურორმა.