მეორე ხარისხის განგრენა მაქვს, მიჭირს მოძრაობა, ციხეში ჩემი დატოვება არ შეიძლება, 58 წლის კაცი ვარ, პატარა ბავშვი არ ვარ, მაგრამ ვერ ვაღიარებ იმას, რაც არ ჩამიდენია, – ამის შესახებ 4 ოქტომბერს განვითარებულ მოვლენებთან დაკავშირებით დაკავებულმა კახაბერ მჟავანაძემ განაცხადა.
მჟავანაძემ სასამართლოში საბოლოო სიტყვა წარმოთქვა.
„სათქმელი ბევრია, ვფიცავ, რომ ვიტყვი სიმართლეს, მხოლოდ სიმართლეს და არაფერს, სხვას. მყავს მეუღლე და ორი შვილი…. ჯანმრთელობის პრობლემები მეც მაქვს, მაგრამ მაინც ვერ ვიტყვი იმ ტყუილს, რაც ათქმევინეთ, ადამიანებს სულში ჩააფურთხეთ.
მეორე ხარისხის განგრენა მაქვს, მიჭირს მოძრაობა, ციხეში ჩემი დატოვება არ შეიძლება, 58 წლის კაცი ვარ, პატარა ბავშვი არ ვარ. თქვენი მისჯის შემდეგ, არ ვიცი რა იქნება, მაგრამ მაინც ვერ ვიტყვი იმას, რაც არ ყოფილა.
ღობე ჩემგან ნახევარ მეტრში წაქცეული იყო, ნაბიჯიც არ შემიდგამს შიგნით, როგორ შეიძლება მითხრათ, იერიშით იღებდითო და აღიარეთო, მე ამას ვერ ვაღიარებ. კი ბატონო, დაწერეთ, 5 წელი, 6 წელი. თქვენს ოჯახში, მოსამართლევ, პროკურორო, მოვალ და ვეტყვი, მოვიქეცი ასე და თქვენმა ოჯახის წევრმა ამდენი მომისაჯა და ციხეში ვიჯექი-მეთქი”,- განაცხადა მჟავანაძემ.
აღნიშნულ ეპიზოდს საერთო ჯამში, 15 ბრალდებული ჰყავდა, თუმცა, 8 ბრალი აღიარა და მათ საპროცესო შეთანხმება გაუფორმდათ.
რაც შეეხებათ, ექიმ გიორგი ჩახუნაშვილს, ია დარახველიძეს, დავით ჟღენტს, კონსტანტინე კოკაიას, კახაბერ მჟავანაძეს, ზაქრო ალბუთაშვილსა და დავით სტურუას, მათ ბრალი არ აღიარეს. შესაბამისად, მათ საპროცესო შეთანხმება არ გაუფორმდათ.
რაც შეეხებათ, ევა შანშიაშვილს, ალექსანდრე გოგოლაძეს, გოჩა ყატაშვილს, სულხან აბრალავას, რამაზ ჯორბენაძეს, ჯანდრი თირქიას, გენადი კელიხაშვილს და დათო ღუწკაიას მათ საპროცესო შეთანხმება გასულ კვირას გაუფორმდათ.
ცნობისთვის, 4 ოქტომბერს განვითარებულ მოვლენებთან დაკავშირებით დაკავებულ ყველა მათგანს ბრალდება საქართველოს სისხლის სამართლის კოდექსის 19-222-ე მუხლის მე-2 ნაწილის “ა“ ქვეპუნქტით აქვთ წარდგენილი, რაც სტრატეგიული და განსაკუთრებული მნიშვნელობის ობიექტების ხელში ჩაგდების და ბლოკირების მცდელობას გულისხმობს ჩადენილს ჯგუფურად. მათ ბრალდება სსსკ-ის 225-ე მუხლის მეორე ნაწილითაც აქვთ წარდგენილი, რაც ჯგუფურ ძალადობაში მონაწილეობას გულისხმობს.