თბილისის საქალაქო სასამართლომ “კოალიცია ცვლილებისთვის” ერთ-ერთი ლიდერის, ნიკა გვარამიას შეურაცხყოფის ფაქტზე გიორგი გედენიძეს 2000-ლარიანი ჯარიმა დააკისრა.
აღნიშნულ ფაქტზე საქმის წარმოება შსს-ის “სიძულვილის ენის წინააღმდეგ ბრძოლის სამმართველომ” დაიწყო.
შსს-ს ცნობით, 3 ივნისს, გიორგი გედენიძემ სოციალურ ქსელში, “იმედის” პოსტზე, ნიკა გვარამიას შეურაცხყოფა მიაყენა.
სასამართლო პროცესს არც გიორგი გედენიძე და არც მისი უფლებადამცველი არ ესწრებოდნენ.
აღნიშნულ ფაქტს, ცოტა ხნის წინ, ნიკა გვარამია სოციალურ ქსელში გამოეხმაურა:
“მედიიდან გავიგე ამ წუთას, რომ ვინმე გიორგი გედენიძე ჩემთვის ფბზე მოყენებული შეურაცხყოფის გამო 2000 ლარით დაუჯარიმებიათ.
არც გიორგი გედენიძე ვიცი, და არც შეურაცხყოფა მისგან. და მე თუ შეურაცხყოფილი არ ვარ, სახელმწიფო “იცავს” ჩემს ღირსებას ჩემი პოზიციის გარეშე? თან ის ხელისუფლება, რომ მაშანტაჟა, 4-ჯერ დამიჭირა, ჩასაფრებები მომიწყო, ჩემი ფოტოები გამოაკრა ყოველი არჩევნების წინ მთელ თბილისში, ცოლშვილი ფარულად გადაიღო და მერე ვიდეო გამომიგზავნა და ვინ მოთვლის კიდევ ასეთი სიგიჟე გაუგონარია,” – წერს ნიკა გვარამია.