სასახლის ღობის საქმე – 7 პატიმრიდან ერთ-ერთმა, ზაქრო ალბუთაშვილმა საპროცესო შეთანხმების თხოვნით პროკურატურას მიმართა, რის გამო განაჩენის გამოცხადება გადაიდო.
დღევანდელ პროცესზე მოსამართლე გიორგი გელაშვილი ბრალდებულების სიტყვას მოისმენს.
სხდომათა დარბაზში ბრალდებულის სტატუსით შევა ექიმი, გიორგი ჩახუნაშვილი, რომელიც ამბობს, რომ 4 ოქტომბრის აქციაზე პროფესიულ მოვალეობას ასრულებდა.
მისი თქმით, ის ყოველთვის, როცა ამის საჭიროებაა, ასრულებს საკუთარ საქმეს და გაუგებარია, რატომ დადის 8 თვის განმავლობაში საქალაქო სასამართლოში საკუთარი სიმართლის დასადასტურებლად.
როგორც მან სხდომის დაწყებამდე განაცხადა, მოლოდინებზე საუბარი უჭირს, თუმცა, მიიჩნევს, რომ სამართლიანი სასამართლოს პირობებში ის დარბაზიდან უნდა გათავისუფლდეს.
“როგორც ყოველთვის, დღესაც ვიტყვი, რომ მე სიტუაციაში ვიყავი იქ, არ უარვყოფ, გავაკეთე ჩემი პროფესიული საქმიანობა. სულ ვიყავი 28 წამი და გამოვედი. დანარჩენს მოვყვები იმას, რაც საზოგადოებას დააინტერესებს, დღეს რასაც ჩვენ ვილაპარაკებთ, წესით მოსამართლემ უნდა გაანალიზოს, შემდეგ რა განაჩენს გამოიტანს ეს იმაზე და საზოგადოებაზე იქნება. დანარჩენი ვნახოთ” – ამბობს ჩახუნაშვილი.