ვიქტორ ჯაფარიძე ლევან ხაბეიშვილის ბრალდებებს პასუხობს – “ხალხის ძალის” დეპუტატი ამბობს, რომ სვანეთში უკანონო მაინინგის საქმესთან არანაირი კავშირი აქვს არც მას და არც მის გარემოცვას. რუსთავის პენიტენციური დაწესებულებიდან გამოქვეყნებულ წერილში ლევან ხაბეიშვილი წერს, რომ სვანეთში უკანონო მაინინგს ჯაფარიძის კლანი აწარმოებს. ვიქტორ ჯაფარიძე “ხალხის ძალის” წევრია, იმ პოლიტიკური ჯგუფის, რომელიც დიტო ხუნდაძის მეშვეობით ირაკლი კობახიძეს ბოლო პერიოდში ამბოხებებს უწყობს. ხაბეიშვილი დარწმუნებულია, რომ ეს არის ირაკლი კობახიძის შურისძიება “ხალხის ძალის” მთავარი დამფინანსებლის წინააღმდეგ.
ვიქტორ ჯაფარიძე, რომელიც წლების განმავლობაში მესტიის მაჟორიტარი იყო, არ ამბობს, ვინ ეწეოდა სვანეთში უკანონო საქმიანობას. ამიტომაც ეს კითხვა ჩვენ მესტიის მერს დავუსვით. კაცი, რომელიც რეგიონზე მთავარი პასუხისმგებელი პირია, პასუხისმგებლობას იხსნის და ამბობს, რომ მისი საქმე არ არის ვის რა უდგას სახლში და ვინ გამოიმუშავებს კრიპტოს უფასო დენით. მესტიის მერმა მხოლოდ ის გვითხრა, რომ ვიქტორ ჯაფარიძის გარემოცვის წევრია.
ვიქტორ ჯაფარიძე პარლამენტში სვანეთის წარმომადგენელია. ჩნდება კითხვა, იცოდა თუ არა მან უკანონო მაინინგის შესახებ და თუ იცოდა, ჩააყენა თუ არა საქმის კურსში პარტია. ხოლო თუ ამის შესახებ ყველასთვის ცნობილი იყო, მაშინ რატომ გადაწყვიტა ქართულმა ოცნებამ ამ პრობლემის ახლა გადაჭრა და არა აქამდე. ივანიშვილის პარტიაში ჯაფარიძესთან დაკავშირებით დასმულ კითხვებს არ პასუხობენ.