წარსულში დაწყებული კონფლიქტი სისხლიან ანგარიშსწორებაში გადაიზარდა. შემთხვევა გუშინ, ქვემო ფონიჭალაში მოხდა. საცხოვრებელი სახლის მიმდებარე ტერიტორიაზე ძმები ყელბერაშვილები და მათი მეგობარი ცეცხლსასროლი იარაღიდან დაჭრეს.
გამოძიების ინფორმაციით, თავდამსხმელმა ახალგაზრდა მამაკაცებს მოძრავი ავტომობილიდან გაუხსნა ცეცხლი. მან, სავარაუდოდ, ოთხჯერ გაისროლა და სამივე დაზარალებულს სხეულის სხვადასხვა არეში დაზიანებები მიაყენა.
ადგილობრივები პირად საუბრებში აცხადებენ, რომ ძმები ყელბერაშვილები თავდასხმის უშუალო სამიზნეები არ ყოფილან. მათი თქმით, ბრალდებული ანგარიშსწორებას მესამე პირთან გეგმავდა, რომელიც შემთხვევის დროს ყელბერაშვილებთან სტუმრად იმყოფებოდა.
შეიარაღებული თავდასხმის საქმეზე ამ დროისთვის სამი პირია დაკავებული. ოფიციალური ინფორმაციით, თავდასხმის დროს სავარაუდო დამნაშავე მარტო არ მოქმედებდა. გამოძიება ერთ პირს განზრახ მკვლელობის მცდელობას ედავება, ხოლო კიდევ ორ პირს — განსაკუთრებით მძიმე დანაშაულის შეუტყობინებლობას.
აღსანიშნავია, რომ შეიარაღებული თავდასხმა ათობით თვითმხილველისა და სათვალთვალო კამერის წინ, პოლიციის განყოფილებიდან რამდენიმე ნაბიჯში მოხდა. საქმეზე გამოძიება გრძელდება.