ბაღიდან გაათავისუფლეს პედაგოგი, რომელსაც 3 წლის ბავშის მშობელი გულგრილობასა და არაადამიანურ მოპყრობაში ადანაშაულებდა.
ამის შესახებ ინფორმაცია Ambebi.ge-ის ბაღის დამფუძნებელმა, ბელა გაბუნიამ დაუდასტურა. გაბუნია ამბობს, რომ ბაღი სამართალდამცველებთან თანამშრომლობს.
ბაღის დამფუძნებლის თქმით, პედაგოგი, რომელიც ბაღიდან გაუშვეს, აღსაზრდელის დედის უბნელია და ისინი ერთმანეთს კარგად იცნობდნენ. ბელა გაბუნია გამოთქვამს ეჭვს, რომ შესაძლოა პედაგოგსა და მშობელს შორის რაიმე სახის პირადს წყენას ჰქონდეს ადგილი.
“ბავშვი იყო ერთი თვის გადასული ახალ ჯგუფში და აქედან ერთი კვირა „ბატონები“ ჰქონდა, არ დადიოდა. ერთი თვის განმავლობაში ვიცით ხოლმე სანამ ახალ ჯგუფს შეეგუება, თითო საათი შედის და არ ჰქონდა, შესაბამისად, დიდი ხნის ურთიერთობა. ორი კვირა იყო სტაბილური მოსიარულე. თუმცა, აქედან რომ დაიწყო ბავშვმა სიარული, დედამ მითხრა, რომ რაღაცა არ მოსწონსო, მასწავლებელს რომ ხედავსო. ვუთხარი, ალბათ ეგუება, ახალი ჯგუფია და მაგიტომ. შესაბამისად, არა გვაქვს საფუძველი, რომ ამ მხრივ… ისეთი ყველამ, ახლა 10 წელი აქა ვართ და არ გვქონია მსგავსი რამ-თქო. მერე მშობელმა მითხრა, რომ არ ვიცი, ვერ ვარ ამ გოგოებთან და ისე დავაბრუნოთ უკანო.
კი ბატონო, დავაბრუნოთ, მაგრამ ასაკობრივად დიდი იყო ბავშვი, შენი სიმშვიდისთვის დავაბრუნოთ-თქო. იქ კი წერს ეგ, რომ „წვდომა არ მომცაო“, პირიქით, არავინ არ შესწინააღმდეგებია, პირიქით, მე თვითონ ვუთხარი, რომ იქნებ ბავშვებთან ვერ რიგდება და ვნახოთ-თქო. არც კი მიფიქრია, რომ რამე ისეთს ვნახავდი. ერთი ახალი კადრი გვყავდა, ერთი სრული, დიდი ხნის თანამშრომელი.
ეს გოგონა ახალი კადრია, ერთი უბნელები არიან, პირადი რამე ჰქონდათ, თუ რა არის არ ვიცი. ვიდეოში ვნახეთ, ბავშვი 10:00 საათზე მოდის და თავის საწოლში არ წვება, გამოაქვს ეს მატრასი, სპეციალური დასაფენი, ხალიჩაზე და იქ აწვენს ბავშვს. ეს რომ ვნახე, ვუთხარი ლოგინში თუ არ დაიძინა ბავშვმა საძინებელში, აქ როგორ დაიძინებდა-თქო? – მაშინვე გავუშვი. ის ფიზიკურად ვეღარ გაჩერდებოდა უკვე ჩვენთან ბაღში. ორივე თანამშრომელი იქვე გავათავისუფლეთ ადგილიდან”- ამბობს გაბუნია.
ბაღის დამფუძნებელი ბავშვზე ფიზიკურ ძალადობას არ ადასტურებს, ამბობს, რომ ადგილზე პოლიციაც იყო მისული და კადრებიც ნახა.
“გუშინ იყო მოსული პოლიცია დაკითხვაზე და ყველაფერი მივაწოდეთ ჩვენ, რაც იყო. არასოდეს არ გვქონია მსგავსი მომენტი, ღმერთს მადლობა, აქამდე ისე მოვედით. მშობელს სამი წელი დაჰყავდა – მსგავსი არ ჰქონია არასდროს. უბრალოდ, რაღაცა ამ მასწავლებელს და ამ მშობელს შორის, არ ვიცი, რა იყო… მეც რომ დედა ვარ, მეც რომ ასეთი მენახა, ადეკვატური რეაქცია მექნებოდა”- უთხრა Ambebi.ge-ის გაბუნიამ.