„ხალხის გატეხვაზე ფსონის დადება შეცდომა იქნება“ — ამის შესახებ საქართველოს მეხუთე პრეზიდენტმა პოლონურ მედიასთან, TVP-თან ინტერვიუში ისაუბრა.
სალომე ზურაბიშვილის განცხადებით, საქართველოში შიშმა მხარე შეიცვალა: მოქალაქეები პროტესტისთვის მზად არიან, ხოლო “ოცნების” ხელისუფლების წარმომადგენლებს სულ უფრო მეტად ეშინიათ პასუხისმგებლობის, კორუფციისა და სახელმწიფო ღალატის ბრალდებების წინაშე.
“საქართველოს მოსახლეობის ძალიან დიდი ნაწილი, იმ ადამიანების ჩათვლითაც კი, ვინც ზოგჯერ კვლავ მხარს უჭერს ქართულ ოცნებას მოსახლეობის სრული უმრავლესობა ითხოვს ამ ევროპულ ინტეგრაციას, ითხოვს დემოკრატიულ და დამოუკიდებელ ქვეყანას. ეს ჩვენს გენებშია, მე ვიტყოდი, ამის დაცვა. ასე რომ, ეს არ არის ისეთი რამ, რაც შეგიძლიათ მარტივად შეცვალოთ. ამას შეიძლება დრო დასჭირდეს, ჩვენ არ ვიცით, როგორ განვითარდება სცენარები, მაგრამ აშკარაა, რომ, მაგალითად, შიშმა მხარეები შეიცვალა. შიში აღარ არის მოსახლეობის მხარეს, ადამიანები მოწადინებულნი არიან, რომ გარისკონ. შიში არის ელიტარული წრეების მხარეს, რომლებიც ხედავენ, რომ ისინი არ არიან დაცულნი დაპატიმრებისგან, ყველაფერში დადანაშაულებისგან – სახელმწიფო ღალატში, კორუფციაში. ეს არის ავტოკრატიების ძალიან კლასიკური დასასრული, რომლის განვითარებასაც ჩვენ ვხედავთ.
კვლავაც, მე არ ვიცი რიტმი, თუ როდის მივა ეს თავის დასასრულამდე. ვფიქრობ, ამის თქმა არავის შეუძლია. ისევე როგორც არავის შეუძლია თქვას, თუ დროის რომელ კონკრეტულ მომენტში შეიძლება ეს ფარული პროტესტი, რომელიც ყოველდღე არის ქუჩებში და ყოველ კვირას უფრო მასშტაბურად და სხვადასხვა ადგილას, მოულოდნელად აფეთქდეს სხვა რამედ. ეს არის ისეთი რამ, რაზეც მე. ხელისუფლება რომ ვიყო, არ დავდებდი ფსონს იმაზე, რომ მათ მოახერხეს ხალხის გატეხვა. ასე რომ, ეს არის არათანაბარი სიტუაცია, რომელშიც ჩვენ კვლავ გვჭირდება, რა თქმა უნდა, საზოგადოებისა და დემოკრატიული ძალების მხრიდან, ჩვენ გვჭირდება მეტი კონსოლიდაცია. აი, ამ მიმართულებით არ ვაკეთებთ საკმარისს.
ქართველების ბრძოლა არის ისეთი რამ, რასაც უფრო ყურადღებით უნდა აკვირდებოდეს ზოგიერთი ჩვენი პარტნიორი, ყველა ჩვენი პარტნიორი, რადგან ეს არის ისეთი რამ, რაც შეიძლება დაემართოს ნებისმიერს, მაშინაც კი, როცა რუსეთთან საზღვრები არ გაქვს” – თქვა სალომე ზურაბიშვილმა.
სალომე ზურაბიშვილის შეფასებით, სწორედ საერთაშორისო იზოლაციაა ერთ-ერთი მთავარი პრობლემა, რომლის წინაშეც დღეს „ქართული ოცნება“ დგას. მეხუთე პრეზიდენტის თქმით, ივანიშვილის გუნდი ვერც ვაშინგტონისა და ვერც ბრიუსელისგან ვერ იღებს იმ პოლიტიკურ მხარდაჭერას, რომელიც მის პოზიციებს გაამყარებდა, რაც “ოცნების” გუნდის შიგნით დაუცველობის განცდას კიდევ უფრო აძლიერებს.
“ამ შემთხვევაში, ჩემი მიზანი უბრალოდ იმის შეხსენება იყო, რომ რუკაზე საქართველოც არსებობს, რაც ყოველთვის ასე არ ხდება ხოლმე, როდესაც მსოფლიოს სხვადასხვა ნაწილსა თუ ჩვენი რეგიონის გარშემო ამდენი, მწვავე კრიზისია. ასე რომ, აშშ-ის ადმინისტრაციასა და ქართულ ოცნებას შორის პრაქტიკულად არანაირი ურთიერთობა არ არსებობს. მათ, ალბათ, უფრო მეტი ისურვებდნენ, რადგან მათი იმედი ყოველთვის ისევე როგორც ევროპელ პარტნიორებთან მიმართებით არის ის, რომ ჰქონდეთ ჩვეული ურთიერთობები ყოველგვარი დათმობების გარეშე. მათ აქვთ იმედი, რომ ეს განამტკიცებს მათ ძალაუფლებას. სწორედ ამიტომ ვამბობ, რომ ისინი თავს ასე უსაფრთხოდ და მყარად ვერ გრძნობენ. ამიტომ მათ ყოველთვის სჭირდებათ ხოლმე რაიმე სახის ხელის ჩამორთმევა ან რაღაც ისეთი, რაც მათ ძალაუფლებას განამტკიცებდა. ამას ჯერჯერობით ვერ იღებენ ამერიკელებისგან, ვერ იღებენ ევროპელებისგან, რომლებიც თანმიმდევრულნი არიან თავიანთ არათანამშრომლობის პოლიტიკაში. ასე რომ, ისინი თავს ძალიან იზოლირებულად გრძნობენ და დროის ამ მოცემულ მომენტში ასეთ მდგომარეობაში ვართ. უცნაური მომენტი იყო პრეზიდენტ ზელენსკისა და ბატონ კობახიძეს შორის შეხვედრა, რომელზეც ჩვენ არ ვიცით, ნიშნავდა თუ არა ეს რამეს, თუ უბრალოდ მასშტაბური ღონისძიების ფარგლებში გამართული გვერდითი შეხვედრა იყო, არ ვიცი” – თქვა სალომე ზურაბიშვილმა.
სალომე ზურაბიშვილი არ გამორიცხავს, რომ ქვეყანაში ვადამდელი არჩევნების საკითხი დღის წესრიგში უფრო ადრე დადგეს. მისი თქმით, არსებობს გარკვეული ნიშნები, რომლებიც მიანიშნებს, რომ „ქართული ოცნება“ შესაძლოა არჩევნებისთვის ემზადებოდეს და ხელისუფლებამ პოლიტიკური პროცესების დაჩქარების გადაწყვეტილება საზოგადოებაში მხარდაჭერის შემდგომი შემცირების თავიდან ასაცილებლად მიიღოს.
“შეიძლება არჩევნები არც იყოს ასე შორს. ჩვენ ეს არ ვიცით. ჩვენ ვიცით, რომ გეგმური არჩევნები 2028 წელს უნდა ჩატარდეს, თუმცა გამორიცხული არაფერია, რადგან არსებობს გარკვეული ნიშნები იმისა, რომ ქართული ოცნება არჩევნებისთვის ემზადება. ისინი აკეთებენ გარკვეულ რაღაცებს, რასაც მაშინ აკეთებ ხოლმე, როდესაც არჩევნების საკმაოდ მალე ჩატარებას აპირებ. მათ შეიძლება გაუჩნდეთ ცდუნება, ჩაატარონ არჩევნები მანამ, სანამ საზოგადოებაში მათი მხარდაჭერის კიდევ უფრო მეტ კლებას, ეროზიას ვიხილავთ. ასე რომ, ეს არის სცენარი, რომელსაც ვერ გამოვრიცხავთ და რომლისთვისაც მზად უნდა ვიყოთ. ეს არის კიდეც ჩემი ერთ-ერთი მუდმივი გზავნილი ოპოზიციურ ძალებთან” – განაცხადა ზურაბიშვილმა.