ბოლნისში დედის მიერ მოკლული 7 წლის ბავშვი ფარუხ ახმედოვია, დედა კი აზერბაიჯანის მოქალაქე სვეტლანა ახმედოვაა – ინფორმაციას Ambebi ge ავრცელებს. მათივე ცნობით, მოკლული ბიჭის მამა საქართველოს მოქალაქეა.
“ძალიან საყვარელი ბავშვი იყო ფარუხი, ჩვენი სკოლის მოსწავლეა, შვიდი წლის. გუშინ კვირა იყო და სახლში იყო ბავშვი, იქ მოხდა ეს ამბავი. ფარუხი მეზობელი სოფლიდან დადიოდა ჩვენთან, ორი კილომეტრის მოშორებით ცხოვრობდა, მის დედას ვიცნობთ, სკოლაში აკითხავდა, არაფერი საეჭვო ჩვენ არასოდეს შეგვიმჩნევია. ძალიან კარგი ბავშვი იყო, ყოჩაღი, არ ვიცით რა მოხდა, რატომ გაიმეტა შვილი მოსაკლავად. ახლა გავიგეთ ეს ამბავი. როგორც ვიცით, ბავშვი დედას მოუკლავს, შესაძლოა მიზეზი მისი ფსიქიკური მდგომარეობა იყოს, სხვანაირად ვერ აგვიხსნია რატომ უნდა მოეკლა შვილი. რა და როგორ მოხდა, არ ვიცით. აზერბაიჯანის მოქალაქეა დედა, სვეტლანა ახმედოვა, ბავშვის მამა საქართველოს მოქალაქეა. კიდევ ჰყავთ ბიჭი და გოგო როგორც ვიცი. სხვას ვერაფერს გეტყვით. ძალიან განვიცდით მომხდარს” – ამბობს გეტას საჯარო სკოლის დირექტორი Ambebi ge-სთან.
ბოლნისში დედამ 7 წლის შვილი გუშინ მოკლა. ის უკვე დაკავებულია. 42 წლის ქალმა 7 წლის ბიჭს სასიკვდილო ჭრილობები დანით მიაყენა. ადგილობრივი მედიის ცნობით, ფაქტის შემდეგ ოჯახის წევრებმა მომხდარის დამალვა სცადეს. გავრცელებული ინფორმაციით, დედამ შვილის მოკვლის შემდეგ თვითმკვლელობა სცადა. შსს-მ გამოძიება სსკ-ის 109-ე მუხლით – წინასწარი შეცნობით არასრულწლოვანის მიმართ განზრახ მკვლელობა დამამძიმებელ გარემოებებში, დაიწყო.