“[ქართულ ოცნებას პოლიციელების მხრიდან ძალადობა] არც წაუხალისებია და არც წაახალისებს… [ღირსების ორდენები] ღირსეულ პოლიციელებს გადაეცათ” – ზვიად შალამბერიძე

ქართულ ოცნებას პოლიციელების მხრიდან ძალადობა არც წაუხალისებია და არც წაახალისებს… – ასე უპასუხა ოცნების დეპუტატმა ზვიად შალამბერიძემ ჟურნალისტის კითხვას, ღირსების მედლების გადაცემით, წაახალისა თუ არა ყაველაშვილმა პოლიციელები მოქალაქეებზე ეძალადათ.

“ბევრი ღირსეული პოლიციელი მუშაობს… ნუ ცდილობთ, რომ დააკნინოთ მათი უფლებები და ვალდებულებები. მთავარი არის, რეაგირება და პრემიერმა გააკეთა მაგაზე გუშინ განცხადება… [ქართულ ოცნებას პოლიციელების მხრიდან ძალადობა] არც წაუხალისებია და არც წაახალისებს… [ღირსების ორდენები] ღირსეულ პოლიციელებს გადაეცათ” [TV პირველი] – განაცხადა ზვიად შალამბერიძემ.

გუშინ, 27 მაისს, გორიდან გავრცელდა კადრები, სადაც ჩანს, რომ კომბინატის დასახლებაში პოლიციელები მოქალაქეებს ფიზიკურად გაუსწორდნენ და დააკავეს. მოგვიანებით პროკურატურამ გაავრცელა განცხადება, რომ გორში პოლიციელების მხრიდან მოქალაქეებზე ძალადობაზე გამოძიება დაიწყო. საღამოს კი პირი, ვისზეც პოლიციელებმა იძალადეს, დააკავეს. ამის შემდეგ, რამდენიმე საათში, ლოცულაშვილმა გორის წინასწარი მოთავსების იზოლატორი დატოვა და ის კლინიკაში გადაიყვანეს.

ცოტა ხნის წინ პროკურატურამ გაავრცელა განცხადება, რომ მომხდართან დაკავშირებით 6 პოლიციელი დააკავეს.

2025 წლის 30 იანვარს მიხეილ ყაველაშვილმა ღირსების ორდერით დააჯილდოვა შსს-ს მაღალჩინოსნები, მათ შორის, გდდ-ს მაღალჩინოსნები, რომლებიც საპროტესტო აქციების დარბევაში იყვნენ ჩართულები.