წამოცდენა თუ რეალური გეგმა? 2032 წელი — ეს ახალი თარიღი ნამდვილად არ არის „ძალიან მალე“, როგორც ამას ეკონომიკის მინისტრის მოადგილე ამტკიცებს. მითუმეტეს, რომ აქამდე თავად მარიამ ქვრივიშვილიც და ირაკლი კობახიძეხ ანაკლიის პორტში პირველი გემის შესვლის თარიღად 2029 წელს აანონსებდნენ. ტელეკომპანია „იმედის“ ეთერში ქვრივიშვილის მიერ გაჟღერებული სკანდალური განცხადების შემდეგ, უწყებას ღამით სპეციალური განმარტების გავრცელება მოუხდა, სადაც წერენ, რომ პორტის მშენებლობის პირველი ფაზა მაინც 2029 წელს დასრულდება.
ეკონომიკის სამინისტროში „ტვ პირველს“ განუცხადეს, რომ მინისტრის მოადგილემ მექანიკური შეცდომა დაუშვა. თუმცა, ქვრივიშვილისავე გამოსვლიდან ირკვევა, რომ პორტის მშენებელ პოტენციურ პარტნიორთან ამ დრომდე მხოლოდ მოლაპარაკებებს აწარმოებენ და მხოლოდ იმედს გამოთქვამენ, რომ ხელშეკრულება ოდესმე გაფორმდება.
არადა, რამდენიმე დღეში, 29 მაისს ზუსტად ორი წელი სრულდება მას შემდეგ, რაც ეს გაურკვეველი მოლაპარაკებები მიმდინარეობს. „ქართული ოცნების“ მაშინდელმა ვიცე-პრემიერმა ჯერ კიდევ 2024 წლის მაისში გვამცნო, რომ ჩინურ-სინგაპურული კონსორციუმი ტენდერში ერთადერთი მონაწილე იყო და მის გამარჯვებულად გამოცხადებას სულ რამდენიმე დღე სჭირდებოდა. ორი წლის შემდეგ კი ირკვევა, რომ სტრატეგიული პროექტის ბედი ისევ ჰაერშია გამოკიდებული.