პარლამენტის საშემოდგომო სესიის პირველი პლენარული სხდომა სახელმწიფო ჰიმნით გაიხსნა. პარლამენტის თავმჯდომარემ დეპუტატებს მიმდინარე სესიის სამუშაო გეგმა გააცნო, რის შემდეგაც დარბაზში პოლიტიკური განცხადებები გაკეთდა.
უმრავლესობის ლიდერებმა ისაუბრეს, ოპოზიციის რიტორიკაზე აფხაზეთისა და ქვეყნის უსაფრთხოების საკითხებზე, რომელიც მათი თქმით, მშვიდობიან პოლიტიკასა და ნდობის აღდგენას საფრთხეს უქმნის.
საქართველოს პარლამენტის თავმჯდომარის პირველი მოადგილის, გიორგი ვოლსკის განცხადებით, 2008 წლის ომის საკითხის შეფასება მხოლოდ იმის გარკვევამდე არ უნდა დავიდეს, ომი 7 თუ 8 აგვისტოს დაიწყო.
“რატომ მოაწერეს ხელი ისეთ რეზოლუციას, სადაც წერია, რომ სწორედ საქართველოა მიზეზი იმისა, რომ ომი დაიწყო და ფართომასშტაბიანი გახდა? სულ სხვა კონტექსტით უნდა იქნას განხილული ეს საკითხი. არა ესე პრიმიტიულად, 7-ში დაიწყო თუ 8-ში.
განგაში რატომ არ ატყდა ივლისში, უშიშროების საბჭოს რატომ არ მიმართეს, ყველამ იცოდა, რომ სამხედრო წვრთნები მიმდინარეობდა როკის გვირაბის იქით – სწორედ ეს არის საკითხები.
ჩვენი პოლიტიკა ემყარება ერთ მთავარ მიზანს, რომ შეიქმნას ისეთი სიტუაცია და ნდობის ის ხარისხი იყოს, რომ როდესაც დადგება გარკვეული პერიოდი, ის დრო აი ამ ვითარებაზე, რასაც ჩვენ უნდა ვქმნიდეთ, ამ ბაზაზე სრულმასშტაბიანი პოლიტიკური მოგვარების შენობა აშენდეს. ამოცანა არის ერთი, რომ ჩვენმა შვილებმა დღეს ერთმანეთს უყურონ არა თოფის სამიზნიდან, არამედ თვალებში ჩახედონ.
კოლეგა ოპონენტებს შევახსენებ, “ქართული ოცნება” ხელისუფლებაში რომ არ მოსულიყო, სწორედ მაშინ შერჩებოდა საქართველოს სახელი დამნაშავის და ვერ სტრასბურგის სასამართლოში ვერ იქნებოდა მოგებული ის საკმაოდ რთული საქმეები, რომელიც ჩვენმა იურისტებმა მოიგეს”, – აცხადებს საქართველოს პარლამენტის თავმჯდომარის პირველი მოადგილე გიორგი ვოლსკი.