პროკურატურამ მინდია შერვაშიძის და თორნიკე თოშხუას განაჩენი გაასაჩივრა – ბრალდების მხარე სასჯელის დამატებას ითხოვს.
დასაბუთებაში, რომელიც სააპელაციო სასამართლოს პროკურატურამ გადაუგზავნა, წერია, რომ თითოეული მსჯავრდებულის მიმართ დანიშნული სასჯელი უნდა გამკაცრდეს შემდეგ გარემოებათა გამო:
“სსკ-ის 39-ე მუხლის პირველი ნაწილის თანახმად, სასჯელის მიზანია სამართლიანობის აღდგენა, ახალი დანაშაულის თავიდან აცილება და დამნაშავის რესოციალიზაცია.
სსკ-ის 53-ე მუხლის პირველი ნაწილის თანახმად, სასამართლო დამნაშავეს სამართლიან სასჯელს დაუნიშნავს ამ კოდექსის კერძო ნაწილის შესაბამისი მუხლით დადგენილ ფარგლებში და ამავე კოდექსის ზოგადი ნაწილის დებულებათა გათვალისწინებით. სასჯელის უფრო მკაცრი სახე შეიძლება დაინიშნოს მხოლოდ მაშინ, როდესაც ნაკლებად მკაცრი სახის სასჯელი ვერ უზრუნველყოფს სასჯელის მიზნის განხორციელებას.
მოცემულ შემთხვევაში პირველი ინსტანციის სასამართლომ დანიშნა ლმობიერი სასჯელი და სათანადოდ არ შეაფასა ის გარემოებები, რომლებიც მიუთითებს მსჯავრდებულთა მიმართ უფრო მკაცრი სასჯელის გამოყენების აუცილებლობაზე”, – წერია დოკუმენტში.
თბილისის საქალაქო სასამართლოს 2016 წლის 01 აპრილის განაჩენით, თორნიკე თოშხუა და მინდია შერვაშიძე ცნობილ იქნენ დამნაშავედ საქართველოს სისხლის სამართლის კოდექსის 126-ე მუხლის პირველი პრიმს ნაწილის „ბ“ ქვეპუნქტით გათვალისწინებული დანაშაულის ჩადენისთვის სასჯელის სახედ და ზომად განესაზღვრათ 1 წლით თავისუფლების აღკვეთა.