დაპატიმრებიდან ხუთი წლის შემდეგ მიხეილ სააკაშვილი დუმილს არღვევს და პირველად ამბობს, რომ ღალატის მსხვერპლია. უკრაინიდან საქართველომდე გზა ორჯერ გამოიარა, თავისუფლებიდან საკანში მის მოხვედრას კი ერთი ავტორი ჰყავდა. სწორედ მის მიმართ ნდობა აღმოჩნდა სააკაშვილისთვის საბედისწერო. ციხეში მყოფი მესამე პრეზიდენტი დამალულ ამბებს ააშკარავებს.
ციხეში მყოფი პრეზიდენტი ამბობს, რომ საქართველოში დაბრუნებას გაცილებით ადრე გეგმავდა. პირველად ამისთვის იახტა დაიქირავა და ქვეყანაში ზღვით შემოსვლა გადაწყვიტა. ბათუმამდე ჩამოსულმა აღმოაჩინა, რომ მისი თავისუფლება საფრთხეში იყო, გეგმა გასცეს. ამიტომ იახტამ გეზი იცვალა და უკან გაბრუნდა. ეს იყო 2020 წელს.
სააკაშვილი ამბობს, რომ საქართველოში ჩამოსვლის მეორე მცდელობაც იმავე ადამიანთან ერთად დაგეგმა. ქვეყანაში შემოსვლა მოახერხა, ვიდეოც ჩაწერა და ხალხს უთხრა, რომ უკვე აქ იყო. თუმცა ამ ვიდეოდან რამდენიმე საათში თბილისში დააკავეს.
ვინ იყო კაცი, რომელიც ერთდროულად მუშაობდა სააკაშვილისთვის და სპეცსამსახურებისთვის? – მესამე პრეზიდენტი მის ვინაობას ჯერ არ ამხელს. მასზე მხოლოდ ის ვიცით, რომ მისი საქართველოში დასაბრუნებლად ბევრს მუშაობდა, ჩადიოდა უკრაინაში და სააკაშვილს არწმუნებდა, რომ მის უსაფრთხოებას ბოლომდე დაიცავდა. ქვეყანაში ჩამოსვლისთანავე პირობა დაარღვია და პრეზიდენტის მტკიცებით, მისი ადგილსამყოფელი სპეცსამსახურებს უთხრა.
კითხვა ვინ უღალატა სააკაშვილს მის პარტიასაც წლებია აწუხებს. სავარაუდოდ, ეჭვებიც არსებობს თუ ვისთან ჰქონდა კონტაქტი საქართველოში ჩამოსვლამდე და ვის შეეძლო მისი გაყიდვა. ზოგიერთმა ეს ამბავი დღეს მის სასამართლო პროცესზე პირველად მოისმინა. ფიქრობენ, რომ ეს ამ ამბის მხოლოდ დასაწყისია და მოღალატეზე კიდევ ბევრს გავიგებთ.