საქართველო ITB China-ს ტურისტულ გამოფენაზე პარტნიორი ქვეყნის სტატუსით მიიღებს მონაწილეობას. ქართველი შეფ-მზარეულები გამოფენის მონაწილეებს ტრადიციულ კერძებს გააცნობენ და კულინარიულ მასტერკლასებს გამართავენ.
„ჩვენი 20-კაციანი გუნდი, რომელიც მზარეულებისგან შედგება, მიემგზავრება ჩინეთში. ჩვენი მიზანია, ITB China-ს გამოფენის სტუმრებს ქართული კულინარია მაღალ დონეზე გავაცნოთ. ეს მნიშვნელოვანია როგორც ჩვენთვის, ასევე ჩვენი ქვეყნისთვის. როგორც ვიცით, ქართული კულინარია და ქართული ღვინო საქართველოს ერთ-ერთი მთავარი საგანძურია, ამიტომ ძალიან დიდი პასუხისმგებლობა გვაკისრია. სტუმრების მხრიდან მოლოდინები დიდია და დარწმუნებული ვარ, ამ ყველაფერს ძალიან კარგი გაცნობითი ხასიათი ექნება“ – გამოფენაზე ქართული სამზარეულოს წარდგენის მნიშვნელობაზე შეფ-მზარეული ირაკლი ასათიანმა ისაუბრა.
შანხაიში, გამოფენის დაწყებამდე, საქართველოს სახელით საზეიმო მიღება გაიმართება, რომელსაც 700-მდე მაღალი რანგის სტუმარი დაესწრება.
გამოფენის ოფიციალური გახსნა საქართველოს სტენდთან მაღალი რანგის დელეგატების ვიზიტით დაიწყება. სამი დღის განმავლობაში ეროვნული სტენდის ვიზიტორებს საშუალება ექნებათ, მიიღონ ამომწურავი ინფორმაცია საქართველოს ტურისტული მიმართულებების შესახებ.