ოკუპირებული აფხაზეთის ე.წ. საგარეო საქმეთა მინისტრმა, ოლეგ ბარციცმა რუსეთის პროპაგანდისტულ მედიასთან ინტერვიუში განაცხადა, რომ აფხაზეთი-საქართველოს საზღვარზე ვითარება სტაბილურია და რუს კოლეგებთან ერთად კონტროლდება. ასევე, აღნიშნა, რომ აფხაზეთი და სამხრეთ ოსეთი დამოუკიდებელი სახელმწიფოებია.
“აფხაზეთი-საქართველოს საზღვარზე ვითარება სტაბილურია, რუს კოლეგებთან ერთად ვაკონტროლებთ… არსებობს ორი დამოუკიდებელი სახელმწიფო, რომელიც ესაზღვრება საქართველოს – აფხაზეთი და სამხრეთ ოსეთი. ჩვენ სავსე ვართ გადაწყვეტილებით, მომავალშიც განვახორციელოთ ჩვენი სახელმწიფოებრივი ეროვნული პროექტი, ამიტომ ამასთან ანგარიშის გაწევა მოუწევთ“ – თქვა ოლეგ ბარციცმა
მისი თქმით, “ერთ თვეში გაიმართება ჟენევის დისკუსიების 67-ე რაუნდი, რომელზეც აფხაზური მხარე კიდევ ერთხელ განაცხადებს მტკიცე ერთგულებას პრობლემების გადაჭრის მშვიდობიანი, დიპლომატიური გზის მიმართ”.
ბარციცი რუსულ პროპაგანდისტულ მედიასთან ამბობს, რომ “აფხაზეთი აყენებს საკითხს სამხედრო ძალის გამოუყენებლობის შესახებ შეთანხმების ხელმოწერის აუცილებლობაზე, თუმცა საქართველო ყოველ ჯერზე უარს ამბობს ასეთ წინადადებაზე”
“აფხაზეთი სრულად ახორციელებს ყველა ღონისძიებას ეკონომიკის, ცხოვრების სტანდარტების განვითარების, სახელმწიფო ხელისუფლების ორგანოების, მათ შორის სპეცსამსახურებისა და სასაზღვრო კონტინგენტის აღჭურვისთვის” – თქვა ოკუპირებული აფხაზეთის ე.წ. საგარეო საქმეთა მინისტრმა.