კოალიცია “ცვლილებისთვის” ლიდერი, ნიკა მელია სასამართლოს გადაწყვეტილების მოლოდინშია. საქალაქო სასამართლოში პროცესი 13:00 საათზეა ჩანიშნული. მოსამართლე ნინო ელიაშვილმა დღეს საბოლოო გადაწყვეტილება უნდა გამოაცხადოს. საუბარია საქმეზე, რომლის მიხედვითაც ნიკა მელიას გამოძიება მოსამართლე ირაკლი ქოჩქიანის შეურაცხყოფას ედავება.
აღნიშნულ სისხლის სამართლის საქმეზე ნიკა მელია არცერთ პროცესს არ დასწრებია და როგორც ცნობილია, არც დღევანდელ სხდომაზე გეგმავს მისვლას. საკუთარ განაჩენს პოლიტიკოსი ტელევიზიით მოისმენს.
ნიკა მელიას ადვოკატი ამბობს, რომ წინდაწინ პროგნოზის გაკეთება უჭირს, რადგან, მისი განმარტებით, აღნიშნული მუხლი ივალისწინებს როგორც ჯარიმას, ისე თავისუფლების აღკვეთას.
“გადაწყვეტილებასთან დაკავშირებით, მას შემდეგ, რაც სასამართლოში წარმოდგენილი იქნება განაჩენები აღსრულებასთან დაკავშირებით, აღნიშნული მუხლი ითვალისწინებს როგორც ჯარიმას, ისე თავისუფლების აღკვეთას და ვნახოთ, რა გადაწყვეტილებას მიიღებს სასამართლო. ვერანაირ პროგნნოზს ვერ გავაკეთებ, არის, როგორც მოგეხსენებათ, ნაკლებად მძიმე კატეგორიის დანაშაული, რომელიც ალტერნატივის სახით ითვალისწინებს როგორც ჯარიმას, ასევე თავისუფლების აღკვეთას 2 წლამდე ვადით. თუმცაღა, იმ პირობებში, როდესაც დღეის მდგომარეობით ნიკა იმყოფება საპატიმროში, ჯერ კიდევ იხდის სასჯელს, წინა განაჩენებით დანიშნულ სასჯელებს ვგულისხმობ, ეს არის კომისიაზე გამოუცხადებლობა და წყლის შესხმის ეპიზოდი სასამართლოსთან მიმართებით, ვერ გავაკეთებთ ვერანაირ პროგოზს, რა სასჯელი შეიძლება იყოს გამოყენებული მასთან მიმართებით, თუმცაღა ობიექტური მიდგოის თვალსაზრისით, თუკი მოსამართლე ჩათვლის და მიიღებს გამამტყუნებელ განაჩენს, სრულიად შესაძლებელია, რომ ნიკასთან მიმართებით გამოყენებული იქნას არასაპატიმრო სასჯელი, როგორიც არის ჯარიმა, რომელსაც ითვალისწინებს აღნიშნული მუხლი” – ამბობს გიორგი კონდახაშვილი.
მელიას ადმინისტრაციულ საქმეთა კოლეგიის მოსამართლის, თორნიკე ქოჩქიანის შეურაცხყოფას ედავებიან. ქოჩქიანი 2025 წლის ნოემბერში ნიკა მელიას ადმინისტრაციულ საქმეს განიხილავდა. მან ლისის ტბის ასახვევთან დაკავებისას პოლიციელის შეურაცხყოფის საბაბით მელია 5 000 ლარით დააჯარიმა.