ლიკვიდირებულია „ჰამასის“ სამხედრო მეთაური იზ ალ-დინ ალ-ჰადადი – ინფორმაციას ადასტურებს ისრაელის არმია. ალ-ჰადადის სიკვდილი სააგენტო Reuters-თან საუბარში დაადასტურა „ჰამასის“ მაღალჩინოსანმაც.
გუშინ, 15 მაისს ისრაელმა განაცხადა, რომ მათი ავიადარტყმის სამიზნე ღაზაში სწორედ „ჰამასის“ ეს ლიდერი იყო, თუმცა მისი ლიკვიდაციის შესახებ ინფორმაცია დადასტურებული არ ყოფილა. იერიში ღაზის დასახლებულ პუნქტში, რიმალის კვარტალში მდებარე საცხოვრებელ კორპუსზე განხორციელდა.
დარტყმიდან რამდენიმე წუთში ისრაელის პრემიერმინისტრმა ბენიამინ ნეთანიაჰუმ და თავდაცვის მინისტრმა ისრაელ კაცმა განაცხადეს, რომ ჰადადის ლიკვიდაციის ბრძანება მათ გასცეს. მათ ის დაახასიათეს, როგორც „ჰამასის სამხედრო ფრთის მეთაური და 7 ოქტომბრის ტრაგედიის ერთ-ერთი მთავარი არქიტექტორი“.
„ალ-ჰადადი პასუხისმგებელი იყო ათასობით ისრაელელი მშვიდობიანი მოქალაქისა და ისრაელის თავდაცვის ძალების ჯარისკაცის მკვლელობასა და გატაცებაში“ – განაცხადეს ნეთანიაჰუმ და კაცმა.