გასაგებია, რასთანაც გვაქვს საქმე, ეს არის კიდევ ერთი მტრული აქტი ქართველი ხალხის წინააღმდეგ, არის მცდელობა, ჩაახშონ თავისუფალი სიტყვა, ჩვენთვის ეს არის კიდევ ერთი საფუძველი, გამოვიტანოთ დასკვნა, რას წარმოადგენს დღევანდელი ევროკავშირი, – ამის შესახებ შალვა პაპუაშვილმა ჟურნალისტის კითხვაზე განაცხადა, რომლის მიხედვითაც, ევროპარლამენტის წარმომადგენლები საზოგადოებრივი მაუწყებლის ხელმძღვანელი პირების დასანქცირებას ითხოვენ.
პაპუაშვილის თქმით, ყველამ უნდა შეხედოს იმ სახელებსა და გვარებს, რომლებიც ამ სანქციებს ითხოვენ.
„უნდა შევხედოთ სახელებს და სახეებს. საქართველოს წინააღმდეგ კამპანიის ავანგარდში ვხედავთ ქართველების მიმართ ფაშისტური განცხადებებით გამორჩეულ რასა იუკნევიჩიენეს და ვხედავთ ასევე, ევროპარლამენტის ახალ ამომავალ ვარსკვლავს, ბრეიზას მგონი, რომელიც სიკორსკის ნაცვლად შევიდა ევროპარლამენტში. ეს ის სიკორსკია, რომელმაც რამდენიმე ხნის წინ დააფუძნა პროპაგანდისტული არხი „ვოტ ტაკ საქართველო“, პოლონეთის საგარეო საქმეთა სამინისტრო, რომელიც პირდაპირ პროპაგანდისტული იარაღია საქართველოს წინააღმდეგ. ქართველ ხალხს ებრძვის პირდაპირ, ეკლესიაზე დაიწყო თავდასხმა. ეს ადამიანი გამოდის და საუბრობს, სიტყვა პროპაგანდა, როგორ უტრიალდება, როცა თავად არის იმ ხელისუფლების წარმომადგენელი, რომელმაც ოფიციალურად შექმნა პროპაგანდისტული იარაღი ქართველი ხალხის წინააღმდეგ. ასე, რომ გასაგებია, რასთანაც გვაქვს საქმე. ეს არის კიდევ ერთი მტრული აქტი ქართველი ხალხის წინააღმდეგ, არის მცდელობა, ჩაახშონ თავისუფალი სიტყვა. ჩვენთვის ეს არის კიდევ ერთი საფუძველი, გამოვიტანოთ დასკვნა, რას წარმოადგენს დღევანდელი ევროკავშირი. დღეს ევროკავშირი არის რასა იუკნევიჩიენე და მისნაირები“, – განაცხადა პაპუაშვილმა.