მსოფლიო ბაზარზე ხორცის რეკორდული გაძვირების ფონზე, საქართველოში საქონლის გაყინული ხორცის იმპორტი გაიზარდა. ოფიციალური სტატისტიკის მიხედვით, 2026 წლის იანვარ-მარტში ქვეყანაში 1 395 ტონა გაყინული ხორცი შემოვიდა, რომლის ღირებულებამ 6.3 მილიონ დოლარს გადააჭარბა. გასული წლის ანალოგიურ პერიოდში იმპორტი 1 129 ტონა იყო.
საქსტატის მონაცემებით, საქართველოსთვის საქონლის გაყინული ხორცის მთავარი მომწოდებელი კვლავ ბრაზილია რჩება — მთლიან იმპორტში მისი წილი თითქმის 79%-ს აღწევს. სამეულში ასევე არიან უკრაინა და ლიეტუვა.
2026 წლის პირველ კვარტალში საქართველოში ყველაზე მეტი გაყინული ხორცი შემდეგი ქვეყნებიდან შემოვიდა:
ბრაზილია — 1097 ტონა, 4.463 მლნ დოლარი;
უკრაინა — 194 ტონა, 938.7 ათასი დოლარი;
ლიეტუვა — 60.3 ტონა, 648.1 ათასი დოლარი;
არგენტინა — 28 ტონა, 91.7 ათასი დოლარი;
ბელარუსი — 8 ტონა, 58.7 ათასი დოლარი.
საშუალო ფასებით თუ ვიმსჯელებთ, ყველაზე ძვირი ლიეტუვური ხორცი აღმოჩნდა — დაახლოებით 10.75 დოლარი კილოგრამზე, მაშინ როცა ბრაზილიური პროდუქტის საშუალო ღირებულება 4 დოლარს შეადგენდა. შედარებით იაფი იყო არგენტინული ხორცი — დაახლოებით 3.28 დოლარი კილოგრამზე.
ამ ფონზე, გაეროს სურსათისა და სოფლის მეურნეობის ორგანიზაციის (FAO) მონაცემებით, მსოფლიოში ხორცის ფასების ინდექსმა აპრილში რეკორდულ ნიშნულს მიაღწია. განსაკუთრებით გაძვირდა მსხვილფეხა რქოსანი პირუტყვის ხორცი, რასაც ბრაზილიაში საექსპორტო მარაგების შემცირება და მიწოდების პრობლემები განაპირობებს.