ეს დაკავება უნდა იყოს მაგალითი ყველასთვის – ასე პასუხობს ირაკლი კობახიძე ერთ დროს ივანიშვილის სანდო კაცის, გიორგი უძილაურის დაკავების შესახებ დასმულ კითხვას.
ფაშიზმზე გამარჯვების დღესთან დაკავშირებით კიკვიძის პარკში მისულ კობახიძეს “ტვ პირველის” ჟურნალისტმა ჰკითხა, თუ რომელი ქვეყნის აგენტობას ედავებიან ბრალდებულ უძილაურს, რაზე პასუხადაც ივანიშვილის გუნდის მაღალჩინოსანმა თქვა, რომ “სახელმწიფოებს შორის ურთიერთოებს გაუფრთხილდება და ქვეყანას არ დაასახელებს”
“მნიშვნელობა არ აქვს ჯაშუში რომელ ქვეყანას ემსახურება. ჯაშუში ყველა შემთხვევაში არის ჯაშუში და აგენტობა ნიშნავს საკუთარი ქვეყნის მიმართ ღალატის ჩადენას. აგენტი ყოველთვის ღალატობს საკუთარი ქვეყნის ინტერესებს. ის გამოხატავს მზადყოფნას, დადგეს საკუთარი ქვეყნის ინტერესბეის წინააღმდეგ. აქედან გამომდინარე, ეს დაკავება უნდა იყოს მაგალითი ყველასთვის. ვინც გადაწყვეტს აგენტობას, საკუთარი ქვეყნის წინააღმდეგ, რა თქმა უნდა, ყველას მიმართ სახელმწიფო იქნება პრინციპულია.
იმისათვის რომ გავუფრთხილდეთ სახელმწიფოებს შორის ურთიერთოებს, ბუნებრივია არ დავასახელებთ სახელწმიფოს. მაგრამ კიდევ ერთელ გაფრთხილება ყველას, მნიშვნელობა არ აქვს ვისი აგენტი ხარ, აგენტობა ყოველთვის არის დანაშაული”, – განაცხადა კობახიძემ.
ჯაშუშობაში ბრალდებული გიორგი უძილაურის, [ფინანსური პოლიციის მაღალჩინოსნის, წარსულში „ქართუ ჯგუფის“ საზოგადოებასთან ურთიერთობის სამსახურის ყოფილი უფროსის] საქმეს გრიფი “საიდუმლო” ადევს.
უძილაურის დაკავების შესახებ პროკურატურამ 5 მაისს გამართულ ბრიფინგზე განაცხადა. მალევე პროსახელისუფლებო ტელეკომპანია “რუსთავი 2-მა” გაავრცელეს ინფორმაცია, რომ გიორგი უძილაურს ედავებიან „ერთ-ერთი ევროპული სახელმწიფოს სასარგებლოდ“ ჯაშუშობას.
გიორგი უძილაურს ბრალდება საქართველოს სისხლის სამართლის კოდექსის 314-ე მუხლის პირველი ნაწილით (ჯაშუშობა) აქვს წარდგენილი. ბრალის დამტკიცების შემთხვევაში, მაღალჩინოსანს 12 წლამდე პატიმრობა ემუქრება.