ევროპარლამენტის ანგარიშში ირაკლი ღარიბაშვილის შესაძლო პატიმრობასთან დაკავშირებულ ჩანაწერს პოლიტოლოგი გია ხუხაშვილი ეხმაურება და ყოფილი პრემიერის ოჯახის წევრების განცხადებებს მწვავედ აკრიტიკებს. მისი თქმით, ღარიბაშვილის გარემოცვა „ურა-პატრიოტიზმს“ ამოფარებულია და რეალურად საკუთარი ინტერესებისა და უსაფრთხოების დაცვას ცდილობს.
ხუხაშვილი ამბობს, რომ ირაკლი ღარიბაშვილის ოჯახის წევრების რიტორიკა „ამაზრზენი“ და „კრებსითი ქოცის“ მაგალითია.
“ამ ურა პატრიოტიზმს ამოფარებული ოჯახის წევრები, რომლებიც თბილად არიან ახლა და ასე რომ ვთქვათ, სარგებლობენ იმ სიკეთეებით, რაც ღარიბაშვილის პრემიერობის პერიოდში მიიღეს, და ახლა დაფრთხნენ, რომ ე მანდ ჩვენც რამე არ მოგვივიდესო და ის ჩალპეს თუ უნდა ციხეში… და, პატრიოტიზმს ეფარებიან და ასეთ ურა პატრიოტულ, ყოვლად ამაზრზენ განცხადებებს აკეთებენ. მე ვფიქრობ, რომ აი, ლექსო თამაზაშვილის მაგალითზე შეიძლება კრებსითი ქოცი ძალიან კარგად დავინახოთ. რომელი ნორმალური სამყარო მიიღებს ისეთ ადამიანს, როგორიც ღარიბაშვილია? ისევ ივანიშვილის ანაბარა უნდა იყოს და ივანიშვილმა ზუსტად ასეთი ხალხი შემოიკრიბა, რომლებსაც სხვაგან წასასვლელი არსად აქვთ” – ამბობს გია ხუხაშვილი.
ირაკლი ღარიბაშვილის ოჯახის წევრები ევროპარლამენტის ანგარიშში ყოფილი პრემიერის შესაძლო პატიმრობასთან დაკავშირებულ ჩანაწერს ეხმაურებიან და მას „პროვოკაციულ ნაბიჯს“ უწოდებენ. ალექსანდრე თამაზაშვილის განცხადებით, ღარიბაშვილის ხსენება ევროპარლამენტის დოკუმენტში „ბინძური პროვოკაციაა“, რომელიც ქვეყნის შიდა პოლიტიკაში სპეკულაციებისა და დეზინფორმაციის გავრცელებას ემსახურება.