ენმ-ის პატიმრობაში მყოფმა ლიდერმა, ლევან ხაბეიშვილმა მასზე, ზვიად მასაშვილსა და გურამ როგავაზე თავდასხმის ბრალდებით დაკავებული ძალოვანების შესახებ სასამართლო პროცესზე ისაუბრა.
როგორც ხაბეიშვილმა განაცხადა, აქციებზე უამრავ ადამიანს სცემეს, კადრშიც კარგად ჩანს და მხოლოდ ორი მათგანის დაკავება არაფერს ნიშნავს.
“მინდა გამოვეხმაურო პროკურატურას. აქ დებილი არავინაა. მარტო მე არ ვუცემივარ აქციაზე სპეცრაზმს. უამრავ ხალხს სცემეს. კადრში ჩანს უამრავი ადამიანი. დააკავეს 2 და დახურულად როგორ გამოაცხადეს საქმე. მე 27 წუთი ვიყავი თავდასხმის ობიექტი. მე მეორე დღესვე დავასახელე თავდამსხმელები. მოვყევი რას მთხოვდა ეს ხალხი და რის სანაცვლოდ შეწყვეტდა ჩემზე თავდასხმას. ვიღაცის ჩვენება ჩვენებაა და ჩემი არა?” – თქვა ლევან ხაბეიშვილმა სასამართლო პროცესზე.
შეგეხსენებთ, რომ 7 მაისს, ლევან ხაბეიშვილზე, გურამ როგავასა და ზვიად მაისაშვილზე თავდასხმის ბრალდებით 3 ყოფილი და 1 მოქმედი სპეცრაზმელი, ასევე დაცვის პოლიციის მოქმედი თანამშრომელი დააკავეს – განცხადება საქართველოს მთავარმა პროკურორმა გიორგი გვარაკიძემ გააკეთა.
ირკვევა, რომ 5-დან ორი, სხვადასხვა სისხლის სამართლის საქმეზე მიმდინარე გამოძიების ფარგლებში, უკვე პატიმრობაში იმყოფება.