ეს ყველაფერი არის თქვენი, საქართველოს მოქალაქეების ბრძოლის შედეგი, ვინაიდან კარგად ვიცით, რომ წლების განმავლობაში, ამ დანაშაულების გამოძიება არ ხდებოდა,-ასე შეაფასა „ლელო-ძლიერი საქართველოს“ ერთ-ერთმა ლიდერმა, ლევან სამუშიამ პოლიტიკოს ლევან ხაბეიშვილის, ჟურნალისტ გურამ როგავასა და მომიტინგე ზვიად მაისაშვილის მიმართ ძალადობის ფაქტზე 5 პირის დაკავება.
როგორც სამუშიამ აღნიშნა, სავარაუდოდ, ამ დანაშაულს ჰყავს დამკვეთები, რომელთა იდენტიფიცირება და დასჯა ასევე მნიშვნელოვანია.
„ამ დანაშაულს ჰყავს არა მარტო შემსრულებლები, ადამიანები, რომლებიც საქართველოს მოქალაქეების ცემასა და წამებაში მონაწილეობდნენ, არამედ ჰყავს დამკვეთებიც. წარმოუდგენელია დამკვეთის გარეშე, გამოძიების განზრახ გაჭიანურება და საქმის განზრახ არგამოძიება, რაც ბუნებრივია, ამ მიმართულებით ეჭვს იწვევს, ვინაიდან წლების განმავლობაში საქმეები თაროზე იყო და არ გამოძიებულა. ასევე, კარგად ვიცით, რომ „ფორმულაზე“ გასული ჟურნალისტური გამოძიების შედეგად, უკვე დაიწყეს სამართლებრივი ქმედებები და პროცესუალური მოქმედებები. მეორე დღეს გვამცნეს, რომ თურმე ადამიანები უკვე დააიდენტიფიცირეს და სისხლის სამართლებრივი დევნა დაიწყეს. ეს მიუთითებს იმაზე, რომ ეს არის თქვენი, საქართველოს მოქალაქეების ბრძოლის შედეგი. ბრძოლას ყველა სამართლებრივი, კონსტიტუციური მეთოდით ყოველთვის აქვს აზრი სამართლიანობისა და სამართლისთვის. დარწმუნებული ვარ, საბოლოოდ, ყველა მოძალადე, რომელიც საქართველოს მოქალაქეებზე ძალადობს, კანონისა და სამართლის წინაშე პასუხს აგებს“,-განაცხადა სამუშიამ.
ცნობისთვის, პროკურატურამ, 2024 წლის აქციების ფარგლებში, მომიტინგე ზვიად მაისაშვილის, პოლიტიკოს ლევან ხაბეიშვილისა და ჟურნალისტ გურამ როგავას მიმართ განხორციელებული ძალადობის ფაქტზე 5 პირი, მათ შორის 3 ყოფილი და ერთი მოქმედი სპეცრაზმელი დააკავა, ასევე, ერთი შინაგან საქმეთა სამინისტროს დაცვის პოლიციის დეპარტამენტის მოქმედი თანამშრომელი. შესაბამისი განცხადება საქართველოს გენერალურმა პროკურორმა გიორგი გვარაკიძემ უწყებაში გამართულ ბრიფინგზე გააკეთა.
გენერალური პროკურორის განმარტებით, 5-დან ორი, სხვადასხვა სისხლის სამართლის საქმეზე მიმდინარე გამოძიების ფარგლებში, უკვე პატიმრობაში იმყოფება.
ამასთან, გვარაკიძის განცხადებით, პროკურატურა სასამართლოს ხუთივე ბრალდებულის მიმართ აღკვეთის ღონისძიების სახით პატიმრობის გამოყენების შუამდგომლობით მიმართავს.