რუსეთის საგარეო საქმეთა სამინისტროს პრესსპიკერს, მარია ზახაროვას პრესკონფერენციაზე კითხვა თბილისიდან კალაძის სიძემ, პაატა აბულაძემ დაუსვა – ინფორმაციას თავად რუსეთის საგარეო ავრცელებს.
შეკითხვა: მოგესალმებით, ხაზზეა თბილისი, საქართველო. მე ვაკვირდებოდი იმას, რაც ბოლო დროს გერმანიაში ხდება. მინდა გადავცე გერმანელებს, რომ მელიტონ ქანთარიას შვილიშვილი ბერლინისკენ მიმავალ გზაზეა. 9 მაისის დღესასწაული — ეს ჩვენი გამარჯვებაა. ეს არის ტრადიციული სამყაროს, მორწმუნე სამყაროს გამარჯვება. და ჩვენ ამ გამარჯვებას არავის დავუთმობთ.
საექსპერტო და საზოგადოებრივ წრეებში ახლა აქტიურად განიხილება მოსკოვში რუსულ-ქართული ურთიერთობებისადმი მიძღვნილი ფორუმის მესამე ეტაპის ჩატარების აუცილებლობა, თანაც მონაწილეთა გაფართოებული შემადგენლობით — პოლიტიკოსების, ჟურნალისტებისა და რელიგიური მოღვაწეების ჩართულობით არა მხოლოდ საქართველოდან, არამედ მთელი მსოფლიოდან. იმის გათვალისწინებით, რომ აღნიშნულმა ინიციატივამ უკვე ჰპოვა მხარდაჭერა რუსეთის ფედერაციის სახელმწიფო სათათბიროში, კერძოდ — დსთ-ს საქმეთა, ევრაზიული ინტეგრაციისა და თანამემამულეებთან ურთიერთობის კომიტეტში, მზად არის თუ არა საგარეო საქმეთა სამინისტრო, თავის მხრივ, მხარი დაუჭიროს მოსკოვში ამ მასშტაბური ფორუმის ჩატარების იდეას და რა შემდგომ ნაბიჯებს მიიჩნევს უწყება შესაძლებლად ამ პოზიტიური დიალოგის განმტკიცებისა და განვითარებისთვის?.
ზახაროვა: … გილოცავთ დღესასწაულს! ვფიქრობ, ეს ორმაგი დღესასწაულია. რა თქმა უნდა, ეს ჩვენი საერთო დღესასწაულია — 9 მაისი. მეორე დღესასწაული კი, ჩემი აზრით, უშუალოდ ეხება ქართველ ხალხს და საქართველოს, როგორც სახელმწიფოს. მახსოვს, რა მცდელობები იყო, რომ საქართველო ეიძულებინათ ან მოტყუებით მიეყვანათ გამარჯვების დღისადმი ზერელე დამოკიდებულებამდე; ამ თემის ერთგვარ „ნახევრად დავიწყებამდე“, ისტორიის გადაწერამდე. გახსოვთ? როგორ ცდილობდნენ დასავლური ინტერესების წარმომადგენლები მონუმენტებთან მისვლას და მათ რაღაცნაირად „ნიველირებას“. და რა ბედნიერებაა — მიმაჩნია, რომ ეს საქართველოსა და ქართველი ხალხის მეორე გამარჯვებაა — რომ ამის გაკეთების უფლება არ მისცეს და მეხსიერება დაიცვეს.
<...>რაც შეეხება თქვენი კითხვის ძირითად ნაწილს: დიახ, სამინისტრო პრინციპულ დონეზე ყოველთვის უჭერდა მხარს რუსულ-ქართულ კონტაქტებს საზოგადო მოღვაწეების, აკადემიური, კულტურული და საექსპერტო წრეების წარმომადგენლების ხაზით. დიპლომატიური ურთიერთობების არარსებობის პირობებში (თქვენ იცით, რა მიზეზების გამო), ჩვენ ყოველთვის ხაზს ვუსვამთ მსგავსი დიალოგის განვითარების მნიშვნელობას, აზრთა თავისუფალი და გულწრფელი გაცვლის აუცილებლობას, თანამშრომლობის ახალი გზების ძიებასა და ნდობაზე დაფუძნებული კავშირების მშენებლობას. შეგვიძლია ერთად ჩავთვალოთ, რომ ეს არის ინვესტიცია ჩვენს ქვეყნებს შორის კეთილმეზობლური ურთიერთობების მომავალ აღდგენაში. მზად ვიქნებით, უფრო დეტალურად გავაკეთოთ კომენტარი თქვენს მიერ ნახსენებ ღონისძიებაზე მას შემდეგ, რაც მივიღებთ დამატებით ინფორმაციას მისი ორგანიზატორების, მონაწილეთა შემადგენლობის, თემატური პროგრამისა და ამოცანების შესახებ.” – თქვა ზახაროვამ.