ირაკლი კობახიძემ დიუშენის კუნთოვანი დისტროფიით დაავადებული ბავშვების მშობლები ჯანდაცვის სამინისტროსთან გადაამისამართა.
ჟურნალისტების კითხვაზე შეხვდება თუ არა მშობლებს, მან ორი სიტყვით უპასუხა: “ჯანდაცვის სამინისტრო”.
ამასთან, კობახიძემ აღნიშნა, რომ სახელმწიფომ გონივრული გადაწყვეტილება უნდა უნდა მიიღოს ყველა თემასთან დაკავშირებით ისე, რომ “გონივრულად დაიხარჯოს თითოეული თეთრი სახელმწიფო ბიუჯეტიდან”.
“გუშინ გავაკეთე კომენტარი, ჯანდაცვის სამინისტრო არის ამ საკითხით დაკავებული. მთავარია, ჯანდაცვის სამინისტროს აქვს ექსპერტული ცოდნა ამ თემასთან დაკავშირებით და უნდა გაგრძელდეს, რა თქმა უნდა, ამ რეჟიმში მუშაობა და რაც მთავარია, გონივრული გადაწყვეტილებები უნდა იყოს მიღებული, ყველა რისკფაქტორი უნდა იყოს გათვალისწინებული, მათ შორის ფარმაცევტული მაფიის ინტერესები, ეს არის ერთ-ერთი მნიშვნელოვანი ფაქტორი, რაც უნდა იყოს გათვალისწინებული. ჩვენ, მთავარია, რომ გონივრული გადაწყვეტილება მივიღოთ ყველა თემასთან დაკავშირებით, ისე, რომ გონივრულად დაიხარჯოს თითოეული თეთრი სახელმწიფო ბიუჯეტიდან.
კიდევ ერთხელ გავიმეორებ, რომ მილიარდიც კი არავის დაენანება, თუ კონკრეტული გადაწყვეტილება იქნება, კონკრეტულ შედეგზე იქნება გათვლილი. მთავარია, მივიღოთ გონივრული და ექსპერტულ ცოდნაზე დაფუძნებული გადაწყვეტილებები,” – განაცხადა კობახიძემ.
ცნობისთვის, დიუშენის კუნთოვანი დისტროფიით დაავადებული ბავშვების მშობლები უკვე თითქმის ორი კვირაა კანცელარიასთან ღამეს ათენებენ და ბავშვებისთვის წამალს ითხოვენ.