ირაკლი კობახიძის განცხადებით, უკრაინის პრეზიდენტთან საქართველოსა და უკრაინას შორის ორმხრივ ურთიერთობებზე ისაუბრა.
მისი თქმით, საუბარი დახურული იყო და ის მის დეტალებზე მეტს ვერაფერს იტყვის. კობახიძე ამბობს, რომ ზელენსკისთან მეგობრული და საინტერესო საუბარი შედგა.
როგორც კობახიძემ აღნიშნა, უკრაინა არის საქართველოს მეგობარი ქვეყანა.
“უკრაინა ჩვენთვის არის მეგობარი ქვეყანა. ჩვენ გვაქვს ტრადიციული, ისტორიული მეგობრობა, რაც აკავშირებს ჩვენს ქვეყნებს და ამას უნდა გავუფრთხილდეთ მაქსიმალურად… ეს იყო მათ შორის ის სულისკვეთება, რომელიც პრეზიდენტს გავუზიარე. […] შეხვედრის შინაარსზე ვერ ვიტყვი ვერაფერს, გამომდინარე იქიდან, რომ ეს იყო დახურული შინაარსის, ფორმატის შეხვედრა. თუმცა, ზოგადად შემიძლია გითხრათ, რომ ეს იყო მეგობრული და საინტერესო საუბარი, რაც შედგა ჩვენს შორის. თავად პრეზიდენტმა გამოხატა ეს ინიციატივა, ჩვენ მყისიერად დავუდასტურეთ მზაობა და გავისაუბრეთ ორმხრივ ურთიერთობებთან დაკავშირებით, არსებითად ეს იყო ამ საუბრის საგანი და კიდევ ერთხელ ვიტყვი, რომ ეს იყო საინტერესო და ძალიან მეგობრული საუბარი.
ზოგადად, შემიძლია გითხრათ, რომ უკრაინა არის ჩვენთვის მეგობარი ქვეყანა. ჩვენ გვაქვს ტრადიციული ისტორიული მეგობრობა, რაც აკავშირებს ჩვენს ქვეყნებს, ჩვენს ხალხებს და ეს იყო მათ შორის ის სულისკვეთება, რაც პრეზიდენტს გავუზიარე” – თქვა ერევანში მყოფმა კობახიძემ ჟურნალისტებთან.