ჩრდილოეთ იაპონიაში 7.5 მაგნიტუდის სიმძლავრის მიწისძვრა მოხდა – იაპონიის მეტეოროლოგიური სააგენტოს ცნობით, მიწისქვეშა ბიძგები სანრიკუს სანაპიროსთან, ივატეს პრეფექტურაში დაფიქსირდა. ივატეს პრეფექტურისთვის, ასევე ჰოკაიდოსა და აომორის ნაწილებისთვის ცუნამის შესახებ გაფრთხილება და რეკომენდაციები ამოქმედდა. სააგენტოს ცნობით, ამ რაიონებში წყლის დონემ შესაძლოა 1 მეტრამდე მიაღწიოს. მთავრობამ კრიზისების მართვის ცენტრში საგანგებო ჯგუფი შექმნა.
“80-სანტიმეტრიანი ცუნამი უკვე დაატყდა თავს ივატეს პრეფექტურის კუჯის პორტს და წყლის დონე კვლავ იმატებს. 40-სანტიმეტრიანი ცუნამი დაფიქსირდა ამავე პრეფექტურის მიაკოს პორტშიც. 30-სანტიმეტრიანი ტალღები შეინიშნება აომორის პრეფექტურის ჰაჩინოჰეს პორტში, ხოლო 20-სანტიმეტრიანი ცუნამი — ჰოკაიდოს ქალაქ ურაკავასა და ერიმოში, ასევე მიაგის პრეფექტურის იშიონმაკი აიუკავაში” – წერს ადგილობრივი მედია.