ქართველებისთვის ეს [ორბანის დამარცხება] ასევე იმედის წუთია და შესაძლოა არა მხოლოდ წუთი – ამის შესახებ ევროპარლამენტარმა უნგრეთში განხორციელებული ცვლილებებისა და პეტერ მადიარის საქართველოსთან მოსალოდნელ უერთიერთობაზე საუბრისას განაცხადა.
იუნევიჩიენე იმედოვნებს, რომ უნგრეთის მომავალი პრემიერი და მთავრობა თანხვედრაში იქნება ევროკავშირის საგარეო მიმართულებასთან.
დარწმუნებული ვარ, რომ პროდემოკრატიული ძალები მხარს დაუჭერენ დემოკრატიას სხვა ქვეყნებშიც, მათ შორის საქართველოშიც – ამბობს იუკნევიჩიენე.
“რა თქმა უნდა, ქართველებისთვის ეს ასევე იმედის წუთია და შესაძლოა არა მხოლოდ წუთი. რადგან საქართველოს ხელისუფლებას ძალიან მჭიდრო ურთიერთობა ჰქონდა ორბანთან და ორბანი იყო ის ადამიანი, ან მისი მთავრობა, ვინც ვეტოს უფლება გამოიყენა ბიძინა ივანიშვილისა და სხვა იმ პირების წინააღმდეგ შემოთავაზებულ სანქციებზე, რომლებიც პასუხისმგებელნი იყვნენ იმაზე, რაც მათ მომიტინგეების წინააღმდეგ გააკეთეს.
პოლიტიკოსებისა და ჟურნალისტების დაპატიმრებაზე, ბევრი ადამიანის ცემაზე ქუჩაში… ახლა ჩვენ გვაქვს სხვა გამოძიებებიც ქიმიკატების გამოყენებაზე და ასე შემდეგ. ასე რომ, ახლა ვნახოთ.
არ მინდა მოგცეთ რაიმე სახის ცარიელი დაპირებები. ეს უნგრელების გადასაწყვეტია, როგორი იქნება მათი პოლიტიკა საქართველოს მიმართ.
რა თქმა უნდა, მე მესმის, უნგრეთისთვის საქართველო დღეს არ არის ის მთავარი თემა, რომელიც არჩევნების შემდეგ პირველივე დღეს დადგება დღის წესრიგში. თუმცა, დარწმუნებული ვარ, რომ საგარეო საქმეთა ახალი ხელმძღვანელობა, სხვა ადამიანები იქნებიან და იმედი მაქვს, რომ ისინი აღადგენენ ურთიერთობას უკრაინასთან. ასე რომ, დარწმუნებული ვარ, რომ პროდემოკრატიული ძალები მხარს დაუჭერენ დემოკრატიას სხვა ქვეყნებშიც, მათ შორის საქართველოშიც”, – განაცხადა რასა იუკნევიჩიენემ.
ვიქტორ ორბანი უნგრეთის საპარლამენტო არჩევნებში დამარცხდა. პეტერ მადიარის ოპოზიციურმა პარტია „ტისამ“ პარლამენტში საკონსტიტუციო უმრავლესობა მოიპოვა, რაც მას ქვეყნის კონსტიტუციაში ცვლილებების შეტანის საშუალებას აძლევს.