მთავრობამ 240 მილიონი დოლარის ქარის სადგურის პროექტზე საჭირო ნებართვები გასცა – ინფორმაციას BMG ავრცელებს.
გამოცემის ცნობით, საუბარია 206 მეგავატიან ქარის სადგურის პროექტზე, რომელიც ბიზნესმენი ლაშა იორდანიშვილის თქმით, ექსპლუატაციაში წელს უნდა შევიდეს. იორდანიშვილი BMG-ს ეუბნება, რომ ჯამში 33 ტურბინა უნდა დაიდგას და პროექტის საინვესტიციო მოცულობა დაახლოებით 240 მლნ დოლარია. სადგურის მშენებლობა ადგილობრივი მთავრობის ნებართვის საფუძველზე დაიწყო, თუმცა როგორც იორდანიშვილი ამბობს, 8 აპრილის განკარგულებით მთავრობისგან ყველა საჭირო ნებართვა მიიღეს.
“ამ განკარგულების პირველ პუნქტში მითითებული შეთანხმების ხელმოწერიდან 30 კალენდარულ დღეში, სს ვინდ ფაუერი ვალდებულია, წარმოადგინოს სამშენებლო საბანკო გარანტია საქართველოს მთავრობის სასარგებლოდ. კომპანიის მიერ სამშენებლო საბანკო გარანტიის წარმოდგენის შემთხვევაში, საქართველოს მთავრობამ უზრუნველყოს სს ვინდ ფაუერის მიერ წარმოდგენილი წინასამშენებლო საბანკო გარანტიის დაბრუნება” – წერია დოკუმენტში.