აფხაზეთის ე.წ რკინიგზის ცნობით, სოხუმი-ოჩამჩირის რკინიგზის მონაკვეთზე რემონტი დასასრულს უახლოვდება – ამის შესახებ აფხაზური Telegram-არხი წერს.
მიზანი ინფრასტრუქტურის მომზადებაა ამ მიმართულებით ახალი მატარებლების მიმოსვლისთვის.
ოკუპირებულ აფხაზეთში რკინიგზის მუშაკებმა შეცვალეს 300 მეტრი ლიანდაგი და დააგეს 2000-ზე მეტი რკინაბეტონის შპალი. პარალელურად, მიმდინარეობს სადგურისა და მიმღები-გასასვლელი ლიანდაგების, გვირაბების, ხიდების, გადასასვლელებისა და სადგურების შეკეთება და აღდგენა.
აფხაზეთის ე.წ რკინიგზის მთავარი ინჟინრის, ლეონიდ ყურუას თქმით, ასეთი მასშტაბური და ყოვლისმომცველი ლიანდაგების რემონტი ომისშემდგომი პერიოდის შემდეგ არ ჩატარებულა. სამუშაოებში ჩართულია აფხაზი სპეციალისტების ორი ჯგუფი, რუსეთიდან ჩამოსული ოთხი ჯგუფი და სპეციალიზებული აღჭურვილობა.