პროკურატურას დადგენილი არ ჰყავს პირი [პირები], ვინც 4 ოქტომბერს კამერები წებოვანი ლენტით დაფარა

4 ოქტომბრის მოვლენებთან დაკავშირებული საქმის პროკურორის, თამარ იაკობიძის განცხადებით, შეიძლება არსებობდეს გონივრული ეჭვი, რომ სასახლის მიმდებარედ კამერებს მიმართულება რომელიმე აქციის მონაწილემ შეუცვალა.

თბილისის პოლიციის დეპარტამენტის მთავარი სამმართველოს გამომძიებელმა, აკაკი ქადაგიშვილმა სასამართლოში დაკითხვისას განაცხადა, რომ სასახლის მიმდებარე ტერიტორიაზე, ერთ-ერთი კამერა წებოვანი ლენტით, ნაწილი საღებავით იყო დაფარული, ზოგს კი მიმართულება ჰქონდა შეცვლილი.

პროკურორის განმარტებით, აღნიშნულთან დაკავშირებით მიმდინარე გამოძიების ფარგლებში ათეულობით ვიდეოჩანაწერია ამოღებული.

თამარ იაკობიძე არ აკნონკრეტებს, რა ინფორმაცია აქვს მოპოვებული გამოძიებას – “ლოგიკურია, გამოძიების ინტერესებიდან გამომდინარე პასუხს არ გაგცემთ”.

“გამომძიებელმა ნამდვილად ისაუბრა საგამოძიებო მოქმედებების ირგვლივ და განაცხადა, რომ გარკვეულ კამერებს მიმართულება ჰქონდათ შეცვლილი. მოგეხსენებათ, რომ გამოყოფილია სისხლის სამართლის საქმე, მხოლოდ იმ 64 ბრალდებულის მიმართ არის საქმე სასამართლოში გამოგზავნილი, რომელთა მიმართაც არსებობდა შესაბამისი მტკიცებულებები.

გონივრული ეჭვი შეიძლება არსებობდეს, რომ ეს აქციის იმ მონაწილეს ჩაედინა, ანუ კამერების მიმართულების შეცვლა და მათ შორის წებოვანი ლენტით დაფარვა, რომელიც მიმდებარე ტერიტორიებს არბევდა, ეს აბსოლუტურად ლოგიკურია, თუმცა გამოძიება ამ მიმართულებით აქტიურად მუშაობს.

ათეულობით ვიდეოჩანაწერი არის ამ შემთხვევაში ამოღებული და მათ მიმდინარე გამოძიების ფარგლებში, რა ინფორმაცია აქვს გამოძიებას მოპოვებული, ამაზე, ლოგიკურია, გამოძიების ინტერესებიდან გამომდინარე პასუხს არ გაგცემთ, თუმცა ეს ინფორმაცია მოცემულ სისხლის სამართლის საქმეში წარმოდგენილია, ამ შემთხვევაში შემთხვევის ადგილის დათვალიერების (ოქმი).

ვინ დაადგინეს წებოვანი ლენტი ვინ გააკრა, ეს ცალკე აღებული წებოვანი ლენტის გადაკვრა შესაძლებელია დანაშაული არ იყოს , მაგრამ ის ქმედებები, რომელიც უკავშირდება კონკრეტული ობიექტების, კერძო საკუთრების რბევას და რამდენიმე ათეულ ზიანს, რომელიც მიაყენეს კერძო პირებს, ეს რა თქმა უნდა დანაშაულია და სწორედ ამ ნაწილში არია, როგორც დაკავებული პირები, ისე გამოყოფილია საქმე,” – ამბობს თამარ იაკობიძე.