კახა კალაძემ დაადასტურა, რომ საქართველოში უახლოეს დღეებში აშშ-ის დელეგაცია ჩამოვა.
„ოპტიმისტური მოლოდინი მაქვს, რასაც აჩენს ის სატელეფონო ზარი, რომელიც განხორციელდა პრემიერმინისტრ ირაკლი კობახიძესა და აშშ-ის სახელმწიფო მდივანს მარკო რუბიოს შორის, გაჟღერებული მესიჯები და ა.შ. შესაბამისად, დაველოდოთ. ჩვენ მზად ვართ, რომ ორ ქვეყანას შორის ურთიერთობები ახალი ფურცლიდან დაიწყოს. ჩვენთვის მნიშვნელოვანია მეგობრობა, სტრატეგიული პარტნიორობა და რაც მთავარია, ეს ყველაფერი უნდა იყოს ორმხრივი” – თქვა მან.
გუშინ გავრცელდა ინფორმაცია, რომ მომავალ კვირას საქართველოში აშშ-ის სახელმწიფო დეპარტამენტის დელეგაციას ელოდებიან. TV პირველის ინფორმაციით, დელეგაციის შემადგენლობა უცნობია, თუმცა შეხვედრების დროს საუბარი ეკონომიკური მიმართულებით შედგება. მათივე ცნობით, დელეგაციის წევრები ოპოზიციისა და სამოქალაქო საზოგადოების წარმომადგენლებს შეხვდებიან.
მანამდე, 30 მარტს, სახელმწიფო დეპარტამენტმა გაავრცელა ინფორმაცია, რომ სახელმწიფო მდივანი მარკო რუბიო ირაკლი კობახიძეს ესაუბრა. მაშინ სახდეპმა დაწერა, რომ მხარეებმა “განიხილეს ორმხრივი ინტერესის სფეროები, მათ შორის უსაფრთხოების საკითხები კავკასიისა და შავი ზღვის რეგიონში”. კობახიძემ კი X-ზე დაწერა: “პროდუქტიული სატელეფონო საუბარი მქონდა სახელმწიფო მდივანთან – ხაზი გავუსვით ჩვენი პარტნიორობის გადატვირთვის მნიშვნელობას და სამხრეთ კავკასიაში საქართველოს, როგორც ძლიერი პარტნიორის, როლის განმტკიცებას”.