თბილისში, 3 000 კვადრატულ მეტრ ფართობზე განთავსებული მიუსაფარი ცხოველების პოპულაციის მართვის ახალი ცენტრი, ფუნქციონირებას ზაფხულში დაიწყებს.
ამის შესახებ „ინტერპრესნიუსს“ თბილისის მერიაში განუცხადეს.
მათივე ინფორმაციით, პოპულაციის მართვის ახალი ცენტრის სამშენებლო სამუშაოები დასკვნით პროცესშია.
„პროექტის მიხედვით, ტერიტორია 3 000 კვადრატულ მეტრ ფართობს მოიცავს, სადაც ინდივიდუალური ვოლიერები, საოპერაციო ბლოკები, პოსტოპერაციული სივრცე და ლაბორატორია განთავსდა. უახლოეს მომავალში ცენტრი თანამედროვე აპარატურითა და ტექნიკით, ასევე, ყველა საჭირო ინვენტარით აღიჭურვება.
ახალი ცენტრი დედაქალაქს 24-საათიან რეჟიმში მოემსახურება. პროექტის მიზანია მიუსაფარი ცხოველების კეთილდღეობა და ამ მიმართულებით მუნიციპალური სერვისების ეფექტურობისა და მოქნილობის გაზრდა“,- განაცხადეს მერიაში.