ვლადიმერ ღუდუშაურთან დაკავშირებით მივმართავთ პროკურორს საპროცესო შეთანხმებასთან დაკავშირებით და მოთხოვნა გვექნება, რომ საქმე საპროცესო შეთანხმებითა და პირობითი მსჯავრით დასრულდეს, – ამის შესახებ საქართველოს თავდაცვის სამინისტროს კუთვნილი დიდი ოდენობით თანხის გაფლანგვისთვის ბრალდებული, თავდაცვის სამინისტროს შესყიდვების დეპარტამენტის ყოფილი უფროსის ვლადიმერ ღუდუშაურის ადვოკატმა, დიმიტრი მჭედლიშვილმა განაცხადა.
როგორც, ადვოკატმა განაცხადა, საპროცესო შეთანხმებასთან დაკავშირებით, პროკურორს, 8 აპრილამდე [8 აპრილს პროკურორი სასამართლოში დასკვნით სიტყვას წარმოთქვამს] მიმართავენ.
„ვინაიდან, 8 აპრილს პროკურორი დასკვნით სიტყვას იტყვის, მანამდე ჩვენ, ვლადიმერ ღუდუშაურთან დაკავშირებით მივმართავთ პროკურორს საპროცესო შეთანხმებასთან დაკავშირებით. ალბათ, მოთხოვნა გვექნება პირობით მსჯავრზე. ზიანის ანაზღაურებას რაც შეეხება, კონსულტაციას გავლილი ჩემი დაცვის ქვეშ მყოფთან, თუმცა როგორც სასამართლოში საქმის განხილვისას გამოიკვეთა, უშუალოდ ღუდუშაურის მხრიდან რაიმე ზიანი არ არის მიყენებული.
პატიმრობას, სჯობია ადამიანს პირობითი მსჯავრი ჰქონდეს, ამიტომ ჩვენი მოთხოვნა იქნება, რომ საქმე საპროცესო შეთანხმებითა და პირობითი მსჯავრით დასრულდეს”,- განაცხადა დიმიტრი მჭედლიშვილმა.