ტროტუარზე დგომის საფუძველზე აქტივისტების სამართალდამრღვევებად გამოცხადების კიდევ ერთი საქმე ადამიანის უფლებათა ევროპულ სასამართლოში გადაიგზავნა.
სინდისის პატიმრის, ზვიად ცეცხლაძის მამის, ზურაბ ცეცხლაძის განცხადებით, ის სტრასბურგის სასამართლოში საკუთარი დარღვეული უფლებების დასაცავად იბრძოლებს.
ზურაბ ცეცხლაძემ მისთვის შეფარდებული შვიდდღიანი ადმინისტრაციული პატიმრობა გაასაჩივრა. მისი თქმით, საჩივარი უკვე მიღებულია და სასამართლომ საქმე წარმოებაში მიიღო.
ამასთან, ცეცხლაძე ყველა აქტივისტს, ვის მიმართაც ადმინისტრაციული პატიმრობა იქნა გამოყენებული ან ჯარიმა იქნა გამოწერილი, საკუთარი უფლებებისთვის სტრასბურგის სასაართლოს მიმართონ.
“ადმინისტრაციულ პატიმრობასთან დაკავშირებით საქართველოში ამოიწურა ორი ინსტანცია და სტრასბურგის საერთაშორისო ადამიანის უფლებათა სასამართლოში გავასაჩივრე. ჩვენი საჩივარი წარმოებაშია მიღებული და ნებისმიერ დროს შეიძლება, მოხდეს მისი განხილვა. სავარაუდოდ, რადგან ასე ადრე მოხდა მისი წარმოებაში მიღება, სწრაფი ტემპით, არ უნდა ველოდოთ, რომ ხანგძლივი ვადის განმავლობაში განიხილავენ მას.
ვისაც ადმინისტრაციული პატიმრობა აქვს, ადინისტრაციული ჯარიმები აქვს და ა.შ., ყველას მოვუწოდებ, რომ აუცილებლად ყველა საქმე სტრასბურგში უნდა გავასაჩივროთ და უნდა დავტვირთოთ მაქსიმალურად, უნდა გაიგონ საერთაშორისო ორგანიზაციებში, როგორი დიქტატორული რეჟიმი მძვინვარებს ჩვენს ქვეყანაში, რომ უკვე აუტანელია ცხოვრება და ეს რეჟიმი ნელ-ნელა გადადის ტირანიაში, – ამბობს ზურა ცეცხლაძე.