სიონის საპატრიარქო ტაძარში მღვდელმთავრები კათოლიკოს-პატრიარქის, ილია მეორის სულის მოსახსენიებელ პანაშვიდს იხდიან.
როგორც იღუმენმა, ლუკა ფალავანდიშვილმა სიონის ტაძართან მედიას განუცხადა, ხვალ პატრიარქის ტახტის მოსაყდრე, მიტროპოლიტი შიო პარაკლისს გადაიხდის და მსახურება 14:00 საათზე დაიწყება.
“ახლა მობრძანებულები არიან მღვდელმთავრები, პანაშვიდს იხდიან.
რაც შეეხება ხვალინდელ დღეს, 25 მარტს არის მეცხრე დღე, უწმინდესისა და უნეტარესის, სრულიად საქართველოს კათოლიკოს პატრიარქის გარდაცვალებიდან. ასევე, 25 მარტს არის საქართველოს ეკლესიის ავტოკეფალიის აღდგენის დღე და ამ საკითხთან დაკავშირებით საქართველოს კათოლიკოს პატრიარქის ტახტის მოსაყდრე, ჩხოროწყუსა და სენაკის მიტროპოლიტი შიო გადაიხდის პარაკლისს. მსახურება 14:00 საათზე დაიწყება”, – განაცხადა იღუმენმა, ლუკა ფალავანდიშვილმა.
ცნობისთვის, სრულიად საქართველოს კათოლიკოს-პატრიარქი, უწმინდესი და უნეტარესი ილია მეორე 17 მარტს გარდაიცვალა. 18 მარტიდან სამების ტაძარში მისი სამოქალაქო პანაშვიდი მიმდინარეობდა. უწმინდესის ხსოვნას პატივი ათასობით მოქალაქემ მიაგო.
ილია II, 22 მარტს, სიონის საპატრიარქო ტაძარში დაკრძალეს.