საქართველოს საპატრიარქოს სხვადასხვა ქვეყნიდან ჩამოსული დელეგაციების წარმომადგენლები ეწვივნენ.
სტუმრები თბილისში სრულიად საქართველოს კათოლიკოს პატრიარქის, ილია მეორის პატივის მისაგებად ჩამოვიდნენ და საქართველოს ეკლესიის მეთაურის დაკრძალვის ცერემონიას დაესწრნენ. სტუმრები გამგზავრებამდე კი საპატრიარქო რეზიდენციას ესტუმრნენ.
დელეგაციის წევრები საპატრიარქო ტახტის მოსაყდრეს, სენაკისა და ჩხოროწყუს მიტროპოლიტ შიოს შეხვდნენ. სტუმრებმა მეუფე შიოსა და წმინდა სინოდის წევრებს სამძიმარი კიდევ ერთხელ გამოუცხადეს.
მიტროპოლიტმა შიომ სტუმრებს საქართველოში ჩამოსვლისთვის და ნუგეშისთვის მადლობა გადაუხადა. შეხვედრების დასრულების შემდეგ მეუფე შიომ სტუმრებს საჩუქრად ხატები და ჯვრები გადასცა.
„ჩამოსულნი იყვნენ დელეგაციები სხვადასხვა ეკლესიიდან და გაფრენამდე ისინი საპატრიარქოში ბრძანდებოდნენ.
საუბრის დროს სტუმრებმა აღნიშნეს საოცრად დიდი სიმრავლე ხალხისა, რომლებიც დასაფლავებისა და წინა დღეებში პატრიარქთან გამოსამშვიდობებლად იყვნენ მოსულები. მათმა გამოხატეს გაოცება ამ დიდი სიყვარულისა და პატივისცემისა, რომელსაც ჩვენი ქვეყნის შვილები გამოხატავდნენ მისი უწმინდესობისადმი.
სტუმრებმა გაამხნევეს წმინდა სინოდის წევრები და საუბრის დროს ალბანეთის ეკლესიის მეთაურმა გაიხსენა თავისი წინამორბედი ეკლესიის მეთაური, რომელიც გამოირჩეოდა დიდი ღვაწლით და აღმშენებლობით ეკლესიებისა და მან თქვა ასეთი რამ: როდესაც გარდაიცვალა უნეტარესი ანასტასიოსი, ეკლესიის წარმომადგენლები ფიქრობდნენ როგორ გააგრძელებდნენ ისინი მომავლში ცხოვრებას და ისე მოხდაო, რომ ჩვენ ყველამ ვიგრძენითო როგორ შეგვეწია მისი ლოცვა იმ ქვეყნიდანო.
ჩვენც ალბათ ახლა ყველანი მისი უწმინდესის მფარველობასა და ლოცვას ზეციდან ვგრძნობთ“, – განაცხადა დეკანოზმა იოანე გორელიშვილმა.