რუსეთი და ჩინეთი ირანს სხვადასხვა გზით უწევენ დახმარებას, მათ შორის „სამხედრო თანამშრომლობის“ ფარგლებში. ამის შესახებ ირანის საგარეო საქმეთა მინისტრმა აბას არაღჩიმ განაცხადა, – წერს Politico.
„წარსულშიც მჭიდროდ ვთანამშრომლობდით და ეს თანამშრომლობა დღემდე გრძელდება, მათ შორის სამხედრო სფეროშიც. ირანს ამ ქვეყნებთან კარგი თანამშრომლობა ჩამოუყალიბდა – პოლიტიკურ, ეკონომიკურ და ასევე სამხედრო მიმართულებებში,“ – თქვა მან.
გამოცემა აღნიშნავს, რომ ირანმა და რუსეთმა ბოლო ათწლეულის განმავლობაში ურთიერთობები მნიშვნელოვნად გაამყარეს. მაგალითად, თეირანი მოსკოვს აწვდის „შაჰედის“ ტიპის დრონებს, რომლებსაც რუსეთი უკრაინაზე იერიშებისთვის იყენებს. მეტიც, ამჟამად რუსეთი თავადაც აწარმოებს უპილოტო აპარატებს Shahed-ის ბაზაზე.
გარდა ამისა, 2021 წელს ირანმა ჩინეთთან 25-წლიანი ეკონომიკური თანამშრომლობის შეთანხმებას მოაწერა ხელი. ამ შეთანხმების მთავარი ნაწილი ირანის მდიდარი ნავთობის მარაგების გაყიდვაა, რათა ჩინეთის ენერგომომარაგება უზრუნველყოს.
არაღჩი ჟურნალისტებთან საუბარში ორმუზის სრუტის თემასაც შეეხო. მისი თქმით, სრუტე დახურულია იმ ტანკერებისა და გემებისთვის, რომლებიც „ირანის მტრებს“ ეკუთვნის.
თუმცა ირანის საგარეო საქმეთა მინისტრმა დააზუსტა, რომ ორმუზის სრუტე „სრულად არ არის დახურული და მიუწვდომელია მხოლოდ ამერიკული და ისრაელის გემებისა და ტანკერებისთვის.“