ეკონომიკის მინისტრის ყოფილმა მოადგილემ, ბრალდებულმა რომეო მიქაუტაძემ თბილისის საქალაქო სასამართლოში საბოლოო სიტყვის წარმოთქმისას განაცხადა, რომ თავისუფლების სანაცვლოდ პროკურატურას დიდი თანხა შესთავაზა.
რომეო მიქაუტაძეს კონკრეტული თანხა არ დაუსახელებია.
“კიდევ ერთხელ მოგმართავთ. გაითვალისწინეთ ვისაც ხელეწიფება. მართალი ადამიანი არ უნდა დაიჩაგროს… არც შეცდომის აღიარება მიჭირს და ვთქვი კიდეც დეკლარაციაში გადაცდომები… თუმცა კარგი პრაქტიკებიც მრავლად იყო… ძალიან დიდი თანხა შევთავაზე პროკურატურას,” – განაცხადა რომეო მიქაუტაძემ.
საბოლოო სიტყვის წარმოთქმისას ბრალდებულმა ოჯახს ბოდიში მოუხადა.
მადლობა ოჯახს, მეგობრებს, ბადრაგს, ციხის თანამშრომლებს. ერთად ყველა რომ არა აქამდე მოსვლა გამიჭირდებოდა… ასე ბოროტმოქმედი ვერ ისაუბრებს… რომ არ მეთქვა ეს ვერ მოვისვენებდი… ახლა ის მაინც ვიცი რომ თავის დაცვა შევძელი… ამ სათქმელის შემდეგ ისევ თავაწეული ვიქნებით მთელი ოჯახი… მითხარით ვის რა ვავნე და რა დავაშავე… ყველაფერ კარგად იქნება,” – თქვა ეკონომიკის მინისტრის ყოფილმა მოადგილემ.
ცნობისთვის, ეკონომიკის მინისტრის ყოფილი მოადგილე სახელმწიფო უსაფრთხოების სამსახურმა 2025 წლის ივნისში დააკავა. გამოძიება სისხლის სამართლის კოდექსის 194-ე მუხლის მე-3 ნაწილის “გ” ქვეპუნქტითა და 332-ე მუხლის მეორე ნაწილით მიმდინარეობს, რაც სასჯელის სახით 9-დან 12 წლამდე პატიმრობას ითვალისწინებს.
მიქაუტაძეს ჯამში 8 499 334 ლარის უკანონო/დაუსაბუთებელი შემოსავლის ლეგალიზებას ედავებიან. ბრალდების მხარის თქმით, თემატური რევიზიის დასკვნის თანახმად, ბრალდებულს 2017-2024 წლებში მიღებული აქვს განსაკუთრებით დიდი ოდენობით უკანონო და დაუსაბუთებელი შემოსავალი, საიდანაც შეძენილი აქტივების ღირებულებამ შეადგინა 8 499 334 ლარი.