თბილისის საქალაქო სასამართლოში კახა კალაძის საარჩევნო ბანერის დაზიანებაში ბრალდებულის, ელენე ხოშტარიას სასამართლო პროცესი მიმდინარეობს.
სხდომას, ისევე როგორც გასულ პროცესებს, არ ესწრება ელენე ხოშტარია. როგორც პენიტენციური დაწესებულებიდან წარმოდგენილი ოქმიდან გაირკვა, ხოშტარია აცხადებდა, რომ ის „ე.წ. სხდომაზე დასწრებას არ აპირებდა“. ასევე, ხოშტარიამ სასამართლოდან გაგზავნილი სხდომის ოქმების ჩაბარებაზე უარი განაცხადა.
დღევანდელ პროცესზე ბრალდების მხარემ აღსრულების ეროვნული ბიუროდან წარმოდგენილი დოკუმენტაცია წარადგინა, რომელიც საქმეს ცნობად დაერთო. აღნიშნულის მიხედვით, ელენე ხოშტარიას 2021 წლიდან 2025 წლამდე დაახლოებით, 16 ადმინისტრაციული სამართალდარღვევა უფიქსირდება და დაკისრებული სახდელებიდან არც ერთია გადახდილი.
დღევანდელ სხდომაზე დასკვნით სიტყვას მხოლოდ ბრალდების მხარე წარმოთქვამს, ვინაიდან ხოშტარია საქმის განხილვაში მონაწილეობას არ იღებს, შესაბამისად, დაცვის მხარე დასკვნითი სიტყვის უფლებით არ ისარგებლებს.
ცნობისთვის, სამართალდამცველებმა ელენე ხოშტარია გასული წლის 15 სექტემბერს დააკავეს.
კახა კალაძის საარჩევნო ბანერის დაზიანებისთვის ელენე ხოშტარიას ბრალდება საქართველოს სისხლის სამართლის კოდექსის 187-ე მუხლის პირველი ნაწილით წარუდგინეს, რაც სხვისი ნივთის დაზიანებას გულისხმობს, რამაც მნიშვნელოვანი ზიანი გამოიწვია. აღნიშნული ქმედება სასჯელის სახედ და ზომად ერთიდან ხუთ წლამდე თავისუფლების აღკვეთას ითვალისწინებს.
აღნიშნულ საქმეზე ელენე ხოშტარიას აღკვეთის ღონისძიების სახით 5 000 ლარის ოდენობით საპატიმრო გირაო ჰქონდა შეფარდებული, რის გადახდაზეც მან უარი განაცხადა და ის განაჩენის გამოცხადებამდე პატიმრობაში იმყოფებოდა.
ხოშტარიამ 14 სექტემბერს, კახა კალაძის საარჩევნო შტაბთან, მის ბანერს გაუკეთა წარწერა „რუსული ოცნება“. შესაბამისი ვიდეო სოციალურ ქსელში მან თავადვე გაავრცელა და განაცხადა, რომ ამ ფორმით სოლიდარობას უცხადებდა მეგი დიასამიძეს, რომელიც სწორედ კახა კალაძის საარჩევნო ბანერის დაზიანების ფაქტზე დააკავეს, შემდეგ კი გირაოს სანაცვლოდ გაათავისუფლეს.